Oranjestad 7 di yüli 2015 – CIBC FirstCaribbean a dal un paso importante riba Djamars 30 di yüni 2015. E la establesé su presensha na Aruba ku apertura di un ofisina di representashon despues di e risibí lisensia pa operá di Banko Sentral di Aruba. E apertura ofisial a tuma luga den presensha di varios dignatario,e Chief Executive Officer (CEO) di CIBC FirstCaribbean, Sr. Rik Parkhill, Sr. Pim van der Burg Ehekutivo General di Dutch Caribbean i a wordu ehekutá dor di Minister di Finansas di Aruba, Sr. Angel Bermudez.

E ofisina di representashon ta un promé paso ku lo habri e oportunidat pa establesimentu di un sukursal kompletu i moderno di e banko na 2016 pa asina por ofresé un variashon amplio di servisio na klientenan interesá den Retail Banking,Platinum Banking, Wealth Management i Corporate Banking.

E ofisina nobo ta supraya e importansha di merkado di Karibe Ulandes pa e banko, ku ya tin presensha na Kòrsou i Sint Maarten.  E banko ta aktivo na Aruba e último dékadanan i a partisipá den transakshonnan di Corporate Banking grandi, rekonosiendo e potensial di e merkado Rubiano, CIBC FirstCaribbean a kere ku aworakí ta un momentu oportuno pa dal e siguiente paso.

Durante di e seremonia di apertura, e representante di CIBC FirstCaribbean a tuma e oportunidat pa entrega un donashon na balor di AWG. 2500,- na Stichting Casa Cuna Progreso.  Esaki a wordu risibí dor di Sr. Carlos Albertus, Vise Presidente di e Direktiva i Sra. Quilin Arends, Direktora di e fundashon. Casa Cuna Progreso ta un kas pa huérfano ku ta brinda un hogar na muchanan entre 0 pa 6 aña.

Durante di e bishita di e Chief Financial Officer di e banko, Sr. Brian Lee a suprayá e kontribushon valioso ku Karibe Ulandes tin na e grupo regional di CIBC FirstCaribbean.