DURANTE PREPARASHON PA SU KONSIERTO

Willemstad – E hoben Shamiro Anita a logra finalisa su estudio di “Master of Science in Business Management” na UOC. Esaki no tabata nada fasil teniendo kuenta ku e mester a kaba su thesis durante e preparashonnan di su Gran Konsierto titula “Kalma E Tormenta” ku lo tuma luga dia 8 augustus den WTC. Su thesis “Internal Barriers to Entrepreneurial Growth: The Case of Curacao” ta unu sumamente interesante ku ta duna rekomendashonan riba e bareranan ku kompanianan na Korsou ta enfrenta den nan kresementu.

Loke ta hasi e historia di Shamiro unu di aploudi ta e echo ku apesar ku e la pasa den dolo i tristesa grandi ku perdida di su ruman muhe y resientemente su wela, tog e la sa di kontinua i kaba tantu su estudio di Bachelor i awor su Master. Riba dje e la sigui ku su karera di musika, kantando kantikanan positivo ku mensahenan di Dios.

Shamiro su orashon ta pa Dios sigui yud’e awor ku e ta bai sigui studia riba nivel di PhD i tambe pa Dios yuda tur ku skucha su kantikanan pa nan haña mas forsa, speransa, pas, i fe den Dios. Por tende i solisita pa su kantika na tur radio na Korsou, Aruba i Bonaire I tambe riba su wepsait ‘www.shamiromusic.com’.

Shamiro ta yama danki na henter e staf, personal, dosentenan i administrashon di UOC ku ta hasiendo nan maksimo esfuerso tur dia. Un danki for di su kurason ta bai tambe na tur media ku ketu bai ta sigui sostené.

Un pabien ta bai pa tur studiantenan ku tambe a logra termina nan estudio i speshal pa Shamiro Anita di parti di su tata, mama, ruman y henter su famia di Korsou y Aruba. Riba e potret por mira Shamiro risibiendo su Master Diploma na UOC.