Djasabra awó: Akshoná, Botoná…. ban Rekoudá!
WILLEMSTAD; Digicel Kòrsou su aporte na atletanan di Special Olympics Curaçao ta kontinuo no únikamente na Kòrsou sino den tur merkado na unda e ta operá. E atletanan di Special Olympics Curaçao semper a forma parti di e aktividatnan, kampañanan i trabounan komunitario di Digicel. E aña aki un bes mas Digicel i Special Olympics Curaçao ta partner pa un akshon na unda ku lo rekoudá fondo pa partisipashon di Kòrsou na e weganan olímpiko ku próksimamente ta tuma lugá. Durante di e akshon lo bende 3 diferente tipo di boton, kada un ku un mensahe di motivashon kreá dor di e propio tim di Special Olympics Curaçao. Djasabra awor dia 27 di yüni entre 9’or di mainta i 2’or di mèrdia un tim kombiná di empleadonan di Digicel Kòrsou, figuranan públiko i atletanan spesial lo purba bende mas tantu boton ku ta posibel i asina rekoudá fondo pa representashon di Kòrsou na weganan olímpiko Los Angeles California entre 25 di yüli i 2 di ougùstùs próksimo. E tim lo ta na Mensings Caminada, Goisco, Albert Heijn, Cost U Less, Mangusa Rio Canario i Mangusa Hypermarket. Kada boton ta kosta Fl.2.
Di akuerdo ku sr. Hans Lute, direktor di Digicel Kòrsou semper ta purba na hasi esfuersonan kombiná. Esaki ta nifiká ku gran parti di e rekoudashon di fondo ta wòrdu sostené via di un donashon anual di Digicel. Pero semper ta hasi un yamada na komunidat pa e tambe yuda e atletanan spesial. “For di 2006 Digicel Kòrsou ta hasi donashon i duna aporte na Special Olympics Curaçao. Digicel su patrosinio na e organisashon ta bai kompañá ku un laso di koperashon ku ta keda sostené den transkurso di henter e aña; asina por menshoná ku e atletanan ta risibí aporte pa entre otro aktividatnan di formashon personal i sosial, pero tambe por konta ku un sosten inkondishonal di maneho di e empresa. Djasabra awor, Digicel ta apelá na Kòrsou pa sostené e organisashon kumprando un di e botonnan spesial”. Digicel a aserká algun figura públiko pa yuda den e rekoudashon di fondo; ta gradisí Ramsley Krips, Von Luca, Mason, Tahnee Jane, Dibo Doran i Dj Ro1 pa di forma genuino hasi donashon di nan tempu pa yuda rekoudá fondo pa Special Olympics Curaçao.
Ademas di aportá dor di akshoná i botoná, tin premio pa gana tambe. Tur hende ku ‘upload’ un pòtrèt di nan mes (‘selfie’) of den grupo ku e boton bistí- usando hashtag #SpecialOlympicsCuracao tin chèns di gana premionan pa kortesia di Yellow House, The Movies Curaçao i Digicel. Ganadó di e promoshon riba Social Media na benefisio di Special Olympics Curaçao lo wòrdu saká dia 3 di yüli dor di un atleta spesial.