Willemstad, 23 di yüni 2015 – JCI IOBA Curaçao resientemente a gana e premio di mihó organisashon lokal di área di Americas durante e Konferensha di JCI di área di Americas ku a tuma luga na Cochabamba, Bolivia.

E aña aki un delegashon di 12 miembro di JCI Dutch Caribbean a partisipá na e konferensha di Americas di JCI ku a tuma lugá na Cochabamba, Bolivia. Grandi tabata nan sorpresa ora ku durante di e seremonia di premiashon a anunsiá JCI IOBA Curaçao komo e ganador di e premio di mihó organisashon lokal di área di Americas 2014. E premio aki ta un rekonosementu pa e proyektonan ku JCI IOBA Curaçao ta hasi pa krea kambio duradero den nos komunidat. Entre otro proyektonan manera Creative Young Entrepreneur Award, Festival di Awa, Home Farming “Tera Krioyo” pero tambe diferente kurso i tayernan ku e organisashon ta ofresé na su miembronan i komunidat en general.

Alabes JCI IOBA Curaçao su proyekto Home Farming ‘Tera Krioyo’ a Sali den e tòp 4 mihó proyektonan di Americas. E proyekto Curaçao Color Walk di JCI Dutch Caribbean a keda nominá komo un di e mihó proyektonan nashonal. Tambe JCI Young Active Leaders of Aruba, un organisashon di JCI na Aruba, a sali e mihó organisashon lokal nobo den área di Americas.

JCI IOBA Curaçao ta sumamente orguyoso ku e logronan aki i ke sigui aportá na desaroyo duradero di nos pais. Un danki ta bai na tur spònser i otro organisashonnan ku durante añanan a kere den JCI IOBA Curaçao i a koperá i sostené nos organisashon. JCI IOBA Curaçao lo sigui traha boluntariamente pa desaroyo di nos dushi Kòrsou.

Junior Chamber International (JCI) ta un organisashon mundial ku tin komo meta ofresé oportunidat di desaroyo ku ta empoderá hóbennan entre 18 pa 40 aña pa di e forma ei trese kambio positivo den nan komunidat. Miembronan di JCI ta traha riba nan propio desaroyo personal i na mes momento, komo siudadanonan aktivo, ta traha riba proyekto ku ta trese solushon duradero pa problemanan den nan komunidat.

JCI IOBA Curaçao ta un di e 5.000 organisashonnan lokal di JCI na mundu i ta konta aktualmente ku 52 miembro. Banda di JCI IOBA Curaçao, tin 3 organisashon lokal mas di JCI na Kòrsou, 2 na Aruba i 1 na Sint Maarten. Tur e organisashon lokal nan aki ta afiliá na e organisashon nashonal JCI Dutch Caribbean.

Tur aña JCI ta organisá kuater konferensha regional, inkluyendo e konferensha di kontinente Amerikano, konosí komo Konferensha di Americas. Durante di e konferensha aki miembronan di JCI ta diskutí tokante futuro i kresementu di e organisashon, partisipá na tayernan pa desaroyá nan abilidatnan i interkambiá eksperensha ku proyektonan enfoká riba solushonnan duradero pa problemanan den komunidat. Tambe tin diferente aktividat sosial i kultural pa miembronan sera lasonan di amistat i sera konosí ku otro su kultura. Un evento importante durante di e konferensha tur aña ta e anochi di premiashon, kaminda ta premia e miembronan, proyektonan i organisashonnan di JCI ku mas a destaká durante di e aña tras di lomba.