Media Boot Camp! Pa di 3 aña na Kòrsou

Tin un gran kantidat di hoben i adultonan na Kòrsou ku tin interes i pashon pa tur loke ta trata media production. Lamentabel ta, ku no tin hopi kurso of seminario disponibel ku por yuda ekspandé nan konosementu i abilidat riba e tereno aki. Pa e motibu aki mes Media School Curaçao ta organisá, pa di tres aña kaba, e tremendo Media Boot Camp.

Media Boot Camp ta un siman intensivo di seminario ku ta kontené workshòpnan riba diferente area di media manera: sinematografia, fotografia, diseño gráfiko, scriptwriting, web design, motion graphics, oudio, iluminashon, animation, marketing i hopi mas. E workshòpnan aki ta keda enkargá pa profeshonalnan, lokal i internashonal, riba e tereno di media. Partisipantenan ta haña varios tarea durante di e bootcamp kaminda nan mester buta tur loke nan siña mesora den práktika. 

Un aspekto nobo e aña aki ta e introdukshon di un MEGA Challenge ku lo hiba MBC2015 na un siguiente nivel di profeshonalismo. Durante e siman di bootcamp aki, partisipantenan ta haña e tarea pa den grupo produsí un pelíkula kortiku ‘from scratch’. MBC2015 lo konkluí ku un tremendo Movie Award Night, kaminda un pènel di zjüry ku ta konsistí di profeshonalnan, lo evaluá kada produkshon i repartí premionan riba diferente kategoria.

E seminario aki ta tuma lugá di 6 pa 12 di yüli di 8or pa 4or, na edifisio di Fundashon Material pa Skol(band’i Cost U Less) i ta kosta solamente fl. 250-, pa henter e siman, ku tur material + lùnch inkluí. Tur persona ku ke registrá por hasi esaki via e página ofisial di MBC2015, www.mediabootcamp2015.com. Riba e sait aki partisipantenan por haña tur sobrá informashon nesesario tokante Media Boot Camp 2015. Pa risibí kontesta riba kualke pregunta lo por tuma kontakto via 560-6611 / 868-6611 òf por manda e-mail na info@mediaschoolcuracao.com.