Willemstad- Cpost International (Cpost) ta bai introdusí Community Mailbox (Cbox) den bario di Wishi, Marchena, Santa Helena, Veeris i besindario. Manera públiko ta korda, nos a introdusí aña pasá e konsepto di sentralisashon di pòstbùsnan na sitionan sentral den barionan di Kòrsou. Wishi, Marchena, Santa Helena, Veeris i besindario lo ta di dos barionan kaminda lo introdusí e konsepto nobo i moderno aki. Entrante 1 di yüli 2015, e habitantenan di e barionan ariba menshoná lo por rekohé nan karta na e Community Mailboxnan (Cboxnan) na Marchena Hardware na Marchena. Dianan 23, 24 i 25 di yüli 2015, e habitantenan ku a risibí nan invitashon na kas por pasa entre 6 pa 8 or di anochi tuma informashon i nan yabi di mailbox riba parkeerplaats di Marchena Hardware na Marchena. E servisio di Community Mailbox ta kompletamente grátis.

Pa por risibí e yabi mester bin ku un identifikashon bálido (pasport, reibeweis òf sédula) di e persona ku ta inskribí na e adrès, dos resibu resien di Aqualectra òf dos di UTS. Den kaso ku bo no tin un di esakinan porfabor bin ku e ultimo dos statement di banko ku riba dje e adrès indiká. Den kaso ku un persona no por asistí pa tuma su yabi e por apoderá un persona pa hasi esaki pe ku un karta di apoderashon. E persona enkuestion mester bin ku identifikashon bálido di tantu di su mes komo e persona ku a apoder’é plùs e dokumentunan indiká mas ariba. Tambe e persona lo risibí un notifikashon via di un email na momentu ku pòst a wòrdu pone den su Cbox.

Un gradisimentu ta bai diparti di Cpost International na gerensha di Marchena Hardware pa a pone un pida tereno disponibel pa por a ubiká e Cboxnan kaminda e habitantenan di Wishi, Marchena, Santa Helena, Veeris i besindario por tin un kaminda central i safe pa kolekta nan pòst.

Pa mas informashon por tuma kontakto ku Departamentu di Servisio na Kliente na telefòn 433-1372, 433-1365, 433-1380 òf 433-1138. Por manda un e-mail na customerservice@cpostint.com.