Willemstad – 18 di yüni 2015 Fin di mei a lanta ofisialmente e kupel di fondonan di penshun den Antianan hulandes i Aruba, ku lo karga e nomber CaPAs. CaPAs ta para pa Caribbean Pension Funds Association. E lantamentu di a kupel a tuma vários luna di preparashon. E idea di e kupel ta inisiativa di 7 fondonan grandi di penshun, kualnan ta Algemeen Pensioenfonds van Curacao (APC), Algemeen Pensioenfonds van Aruba (APFA), Algemeen Pensioenfonds van Sint Maarten (APS), Pensioenfonds Caribisch Nederland (PCN), e fondonan di Banko Maduro (MCB) i Caribbean Mercantile Bank (CMB) i Stichting pensioenfonds Vidanova. E fondonan di penshun tur ta wòrdu konfrontá ku retonan importante, ora ta trata hasimentu di invershon, supervishon dor di bankonan sentral, ‘corporate goverance’ i edukashon permanente.

Tambe por bisa ku e fondonan di penshun tur tin ku enfrentá asuntunan similiar, ora ta trata di e echo ku hendenan ta biba mas largu i e fluktuashonnan riba merkadonan finansiero. Dor di koperá ku otro bou di e kupel, e fondonan tin konfiansa ku nan por yega na funshonamentu aun mihó i hasi e sektor den su totalidat mas fuerte, mientras ku ta pidi atenshon di e “stakeholders” pa vários problemátika.

E direktiva, ku ta konsistí di representante di e diferente fondonan, ta wòrdu representá pa e direktora di APC, Evelyn S. Kruithof-Bor komo presidente di e direktiva, Sheila Van Veen, direktor di APFA komo presidente suplente i señora Clementine Wallé, direktor di e fondo di penshun di MCB komo tesorero. CaPAs pronto lo kuminsá ku e proseso pa rekrutá otro fondonan di penshun pa afiliá nan mes na e kupel. Tambe CaPAs lo traha pa organisá diferente kurso i seminario pa e sektor di penshun. E fondonan di penshun, den esfuersonan pa yega na un kupel di fondonan di penshun, a risibí ayudo di e ofisina di Montae Caribbean, ku ta speshalistsa den materianan di penshun. Personanan òf instanshanan ku ke bin den kontakto ku CaPAs, por manda un email pa: info@pensioenkoepel.org.