Dia 23 di ougùstùs último, AMAK a kumpli 45 aña di eksistensia. Den añanan 60, e músikonan di e tempu ei tabata sinti un inhustisia ku tabata tuma lugá kontra músikonan den un di e hotelnan grandi di Kòrsou e tempu ei ku tabata Intercontinental Hotel.  E situashon kada bes tabata bira mas malu, lokual a pone ku músikonan tabata reuní na vários okashon pa mira kon por a yega na un asosiashon di músikonan di Kòrsou, ku lo por sali na nan interés. Un di e personanan klave ku tabata ekspresá su preokupashon na vários okashon tabata Sr. Newburn Patruck  dfm, Músiko Pianista Komersiante, kende porsièrto tabata doño di un dje establesimentunan ku tabata bende instrumènt di muzik. Vários lidernan di banda di e tempu ei bou di direkshon di Peng de Windt d.f.m tabata  reuní na Zeemanshuis pa mas pronto posibel yega na e organisashon nobo. Asina pues na 1968, Ofisialmente Direktiva di Asosiashon Músiko a keda funda dia 23 di ougùstùs ora ku e statutonan a keda aprobá pa gobernadó. Na otro okashon lo bai den mas detaye di tur e logronan di AMAK den e 45 aña pero no por keda sin menshoná esnan mas importante: Na 1973 Direktiva di AMAK a optené e derecho pa organisá festival di Tumba despues ku músikonan a bai Concordiastraat saliendo for di Penstraat, kaminda nan marcha bai. Gruponan musikal ku a partisipá na e promé dos festivalnan, tabata mal kontentu, pa e falta di rèspèt, ku tabatin pa e músikonan, i pa e motibu ei, a tene e akshon, pa nan organisashon mes por organisá e festival. Di 1972 pa 1975 Promé proyekto di Formashon Musikal bou di direkshon di Feco Gomes i ku dosente  prinsipal,  Alvaro Rojas. 13 di febrüari 1976, despues di vários reunion ku Ministernan na turno,  a logra ku Gobièrnu a saka un dekreto Ministerial, den kual Gezaghebber komo Hefe lokal di Polis mester tende direktiva di AMAK riba tur lokual ku ta trata entrada di músikonan estranhero. Den añanan 80 i 90 Festival di Tumba a sigui krese na kantidat di hende ku mester a Sali for di salanan kubrí  pa kuminsá hasi uso di espasionan  mas grandi manera Stadion di SUBT i Festival Center.

1990:  Promé Festival di Tumba den Curaçao Festival Center. Di añanan 2000 pa ariba, a lanta Instituto pa Formashon Musikal pa traha riba relevo di nos músikonan. Aktualmente direktiva di AMAK ta trahando fuerte pa estrechá lasonan ku Islanan den Karibe . Teniendo na kuenta ku e  situashon di farándula i tambe e situashon ekonómiko general di Kòrsou, direktiva despues di a konsultá ku  su miembronan, a opta pa tene e selebrashon den un forma mas moderá, pero ku tin un balor agregá pa desaroyo di nos músikonan. Ta peseí a hinka un programa den otro kaminda primeramente ta bai tin tayernan importante i  djadumingu dia 22 di sèptèmber lo tene un “Dia di Famia”, kaminda pueblo engeneral ta keda invitá pa bin selebrá e echo memorabel aki. Pa lokual ta trata e resepshon, pa miembronan i invitadonan, direktiva a tuma e desishon, pa organisá esaki riba dia di Músiko. Riba e fecha aki tambe, Don Felio Colinet, lo hasi entrega di e buki, den kua ela dokumentá 42 aña Festival di Tumba di Kòrsou.