fondonan rekoudá ta pa Fundashon Duna Mucha Un Man

Willemstad – Un di e promé atkisishon di Hollandse Nieuwe, haring, ta den man di Curaçao Lions Club i djabièrnè dia 26 di yüni di 7 pm pa 9 pm Curaçao Lions Club ta organisá un Haring Party na restorant Ginger (Pietermaai) ku e meta pa rekoudá fondo pa “Fundashon Duna Mucha un Man”. Pa solamente NAf. 100,- bo ta kumpra bo karchi i disfruta no limitá di delisioso haring i bebida (serbes, jenever, biña i soft).

Ku bo karchi tambe bo tin akseso na lugá di parker ku a keda reserva spesial pa e okashon aki. Tin solamente 250 karchi disponibel i ta optenibel serka miembronan di Curaçao Lions Club, Mensing’s Caminada, restaurant Ginger i na Albert Heyn serka e ‘visboer’. Sea bo ta kom’é ku pan òf bo ta ‘hap’ e manda abou e ambiente ta bai ta úniko manera semper ta e kaso ku aktividatnan organisá pa Curaçao Lions Club.

Fundashon Duna Mucha Un Man ta un proyekto di Curaçao Lions Club ku tin komo meta pa duna e mucha un man i evitá mas tantu ku ta posibel ku e mucha ta kai den e sirkuíto robés. E fundashon ta fokùs riba suministrá desayuno na skol. E proyekto ta aktivo for di mart 1998 i ya mas ku 35 skol i 1700 alumno ta hañando desayuno grátis na skol.

Curaçao Lions Club ta yama danki na tur e diferente sponser ku a hasi e delisioso evento aki posibel, restorant Ginger, CocaCola, Moises de Marchena, Leañez, Wine Factory i Asphalt Lake Recovery. Tambe un danki na Citco, First Caribbean Bank, Banko Mercantil i LHB ku a pone nan lugá di stashoná outo disponibel pa e evento.

Amantenan di haring, Curaçao Lions Club ta invitá bo djabièrnè dia 26 di yüni na restorant Ginger na Haring Party. Preis ta solamente NAf. 100,- i ta inkluí haring, bebidá i lugá di parker. Fondonan rekoudá ta bai pa Fundashon Duna Mucha un Man.