WILLEMSTAD — Direktiva di AMAK a tuma nota di fayesimentu di e gran músiko interpreté Cesar “Guagua” Amasia. Direktiva di AMAK tra kontentu ku últimamente a organisá un homenahe pa Cesar “Guagua” Amasia ku e por a disfrutá durante su último dianan di dje aki na mundu.

Cesar ta un tremendo kantante, ku ta kanta tur género di músika i ku a militá den diferente agrupashonnan musikal manera entre otro, Boeili Sound, El Gran Poder de la Salsa y Doble R Super Spesial Stars i otro nan.

Pa basta dia kaba, e gran baluarte aki tabata sufriendo kebrante di salú i e momento a yega ku Todo Poderoso a pone un fin na e sufrimentu aki i pa dun’é un lugá den su reino.

Direktiva di AMAK a komprondé ku djabièrnè próksimo na Memorial Park na Brievengat e entiero di Cesar “Guagua” Amasia lo tuma lugá i direktiva ta pidi tur músiko ku por pa asistí i tuma despedida di e gran músiko aki. Cesar sosegá na pas.