Un compromiso serio di tur cu ta traha directamente of indirectamente cu turismo ta esencial

ORANJESTAD, Aruba – 15 di juni 2015: Aruba Tourism Authority hunto cu Ministerio di Turismo a traha hunto pa por crea un campaña di conscientisacion nobo pa Aruba. Tur hende por corda ainda e exito grandi cu e campaña anterior di “Mi Compromiso” tabatin riba cada un di nos ciudadanonan. Awe Aruba ta depende mas ainda di e sector turistico y pa e motibo aki ta hopi importante pa inverti den nos hendenan, considera como un di e ingredientenan fuerte den e exito di nos turismo.

Pa e motibo aki a dicidi di lansa un campaña nobo pa asina conscientisa tur ciudadano di Aruba, specialmente esunnan cu ta traha den e sector turistico, di con importante nos turismo y nos comportacion ta pa nos isla. E ta importante pa semper trata nos bishitantenan, pero tambe nos conciudadanonan, na e miho forma dunando un sonrisa y yuda nan den e miho forma.

E nomber di e campaña ta “Duna Aruba e miho di bo”. Esaki tambe ta e enfasis cu lo bini dilanti den e campaña pa asina stimula e ciudadano pa duna e miho di dje, pa ta un miho ciudadano cual e turista, como tambe amigo nan, famia nan, bisiña, colega nan tambe lo beneficia di dje. “Dunando Aruba e miho di bo” ta crea un miho comunidad y ta conduci na un Aruba mas feliz.

Lo uza diferente tipo di media durante e campaña di conscientisacion, manera radio, corant, television, bus y rednan social pa yega cerca e grupo di persona cu ta traha den turismo y esunnan cu ta yega den contacto cu turistanan.

Den hopi ocasion ta pensa cu turismo ta solamente hotel, taxi y restaurant, sinembargo Aruba completo ta turismo. Hopi biaha e bishitante ta hay’e den contacto cu diferente ciudadanonan local manera ora di cumpra gasolin, ora di bay banco, haya asistencia medico. Es decir cu e enfoke lo no ta solamente riba esunnan trahando den e sector turistico, sino pa henter Aruba den su totalidad.

E campaña ta start na juni y lo sigui te cu luna di december. Pa e campaña lo uza diferente cara cu diferente ehempel di con pa Duna Aruba e miho di bo. Juan Torres di Animagic a produci e propagandanan di television, Ayrton Tromp a saca e potretnan, Concept Creations a haci e diseñonan y Jonathan Thiel a canta y produci un Jingle cu lo uza na radio y television.

Pa e jingle a uza un combinacion di ritmonan autentico di Aruba combina cu ritmonan mas moderno. E palabranan uza den e jingle ta sirbi e proposito pa laga cada hende para un rato y sinti e mensahe pa por Duna Aruba e miho di bo.

Pa loke ta e comercialnan di television a ilustra un total di 11 diferente forma of ehempel con un ciudadano di Aruba por Duna e miho di dje den un esfuerso pa duna e servicio ideal na nos bishitantenan y den un esfuerso pa nos tur ta un miho ciudadano pa nos pais.

A lansa e campaña durante un recepcion masha ameno riba e plenchi dilanti di Museo Arkeologico di Aruba. Diferente invitado di e sector di turismo y servicio tabata presente pa por ta un di e prome nan pa cera conoci cu e campaña “Duna Aruba e miho di bo”.

Minister di Turismo, Otmar Oduber y C.E.O di Aruba Tourism Authority, Ronella Tjin Asjoe-Croes a hiba palabra pa asina pone enfasis riba e importancia pa tin un campaña nacional di conscientisacion.

Tanto Minister como e CEO di Aruba Tourism Authority a inicia un conteo cu a culmina den presentacion di e jingle. Na momento di presenta e Jingle, a sorprende e invitadonan pa un presentacion di Jonathan Thiel kende a canta e jingle di e campaña den forma bibo. Despues a comparti algun di e comercialnan di television cu e invitadonan.

Mirando cu e campaña aki ta trata specificamente riba con pa duna lo miho di nos pa Aruba, a scoge e sitio historico di Museo Numismatico y Cas di Famia Ecury como e “backdrop” di henter e lansamento. Durante e recepcion Museo Arkeologico a habri su portanan tambe pa publico por a pasa parti paden y aprecia e historia rico cu tin pa ofrece.