Premio mayó pa Myrisa Phelipa di ZMLK Marieta Alberto
WILLEMSTAD – Pa sera e kampaña bou di skolnan lokal pa stimulá alumnonan pa konvertí nan soño pa futuro di Kòrsou den un dibuho òf otro forma ekspresivo, djadumingu e sentro di kompra Sambil na Veeris a anunsiá e ganadónan. Sambil su gerente general Jonathan Cohen a entregá e premionan korespondiente na e ganadónan den presensia di minister Irene Dick di enseñansa.
A invitá e ganadónan, nan klas, nan maestro i nan mayornan i otro miembronan di famia pa djadumingu 1 or den e sentro nobo di kompra kaminda lo a anunsiá e resultado di e kampaña. Antisipando e inougurashon di e sentro di kompra e kampaña a start na aprel, dirigí prinsipalmente riba skolnan básiko i nan alumnonan. Lòs di esaki tin un kampaña similar pa e públiko general ku no a kaba ainda. A pidi tur pa pinta nan soño pa futuro di Kòrsou. Kada skol mester a manda e mihó dibuho na kidsofcuracao@sambil.cw ku splikashon aserka pa despues habri oportunidat pa vota pa e dibuho mas kerí di soño for di esnan ku a drenta. Nan a reprodusí algun di nan for di dia di e apertura dia 28 di mei último na grandi komo mural den Sambil.
Premionan
Komo premio Sambil a primintí e ganadónan bale ku nan por gasta na establesimentunan den Sambil i pa entrada pa e teater Cinemark. Pa e skolnan ku e kuater ganadónan kalifiká mas haltu tabatin tambe plaka na efektivo pa por kubri nan gastunan nesesario na bienestar di e skol.
Djadumingu mitar di 2 di mèrdia a bini huntu den food court. Pa habri e enkuentro e koro Grupo Karabelitos a kanta himno di Kòrsou, pa e públiko presente tambe kai aden. Despues direktor Jonathan Cohen a yama tur hende bonbiní mustrando ku e invershon den Sambil Curaçao ta dirigí riba krea un Kòrsou pa futuro. Ku e kampaña Sambil ta proba di ta mas ku djis un sentro di kompra – tin hopi kos pa hubentut. Ku esaki na mente a enkurashá e hóbennan pa visualisá nan soño di nan isla den un dibuho. Esaki a produsí bunita resultado.
Ganadónan
Un pa un a yama e ganadónan pa bini dilanti pa tuma nan premio. Nan tabata respektivamente na di 10 lugá Eithan Marchena di 8 aña di Kolegio Krijt; na number 9 Roshaina Ricardo (13 aña) di skol Nelly Winkel; na number 8 Ocean Lynn Kuizenga (7) di St. Franciscus College; na number 7 Sarah Vieira Ribeiro (14) di International School of Curaçao; na number 6 un kolektividat di Kyle Evers (10), Viggo Martens (10), Noa Blaaker (12) i Pieter van Blanken (13) di Klein College; na number 5 Roenchelo Calvenhoven (13) di skol Alablanka; na number 4 Lionel Christian (10) di Kolegio Santa Clara; na number 3 Gedion de Windt di VSBO SKAIH; na number 2 Tijonie Suart (11) di Kolegio Monseñor Willem Ellis; i e premio máksimo a bai pa Myrisa Phelipa (16) di ZMLK Marieta Alberto. E último kuater skolnan respektivamente a haña
di Sambil e suma di 1000, 2000, 3500 i 7500 florin. Ademas Sambil a ofresé e dies skolnan pa laga pinta na man e dibuho ganador di nan alumno riba un muraya di e skol di moda ku e soño ta keda biba por lo pronto.
Apresio
Minister Dick di enseñansa a ekspresá su apresio pa e akshon aki di Sambil pa wak futuro di Kòrsou atraves di e wowonan di hóbennan lokal. Kada un di nan a demostrá un vishon ku nan tin pa nan isla. E minister a elogiá e aktividatnan pa hóbennan ku ta mas ku el a kere promé. Na final e muchanan a haña un trit i e wéspetnan a sigui disfrutá den e sentro di kompra.
