Djasabra 27 di yüni próksimo Sentro Kultural Kòrsou ta presentá su konsierto “CuraJazz” ku presentashon di 2 di nos gran maestronan ku ta Eric Calmes huntu ku Norman Moron.  E konsierto lo keda tené den e Hòfi Kultural di Sentro Kultural Kòrsou situá den Emmastad i ta planiá pa kuminsá 8’or di anochi. Sentro Kultural Kòrsou a sòru pa hinka un programa hopi interesante den otro den kua lo tin un preshow ku un presentashon di alumnonan di Akademia di Músika Edgar Palm, sigui pa un presentashon speshal di “Norman Moron in Trio” ku Norman Moron, Eric Calmes i Etzel Provence i final di anochi lo tin presentashon di  “Eric Calmes & Friends” den kua Eric Calmes lo presentá ku e siguiente músikonan: Ronchi Matthew riba keyboards, Cedric Dandaré riba kitara, Konky Helmijer riba steelpan, Marvin Snijders riba percussions, Gilbert Braaf riba drums, Ismael Gonzalez, Dennis Aalse riba trompèt i Eric Calmes riba bas. Lo e bira un anochi hopi interesante durante kua lo tin un meskla di músika lokal di tumbamesklá ku Jazz.  Karchi di entrada ta optenibel na balor di naf. 55,00 na Mensing’s Caminada, 24 Uur uit de muur, Bruna, Albert Heijn i na ofisina di Sentro Kultural Kòrsou den Emmastad. Tur amante di bon musika ta kordialmente invitá pa bin gosa di un anochi musikal na Sentro Kultural Kòrsou.