Wikent proksimo futbolistanan ta ….

WILLEMSTAD — Wikent proksimo, for di djabierne 12 di Yuni te ku djadumingu 14 di Yuni proksimo, varios futbolista estelar di ekiponan di FFK lo bai djoin den un torneo di futbol amistoso entre iglesianan pa asina genera fondo pa konstrukshon di Iglesia Pas na Tera. E vishon tras di e torneo di futbol aki ta pa ban kibra huntu e gara di kosnan negativo ku ta afekta entre otro deporte futbol pero tambe den nos komunidat en general i pa huntu pone un union den timnan di futbol pero tambe hungadornan ku tur hende ta mira diariamente durante partidonan di futbol di FFK. Pa e torneo aki, ku lo tuma luga riba kancha di futbol na KAE, Federashon di Futbol Korsou, i su presidente, Sr. Jean Franciska tambe ta duna su full sosten pa trese mas disiplina den Deporte di Korsou. Algun di e futbolistanan ku lo tei wikent proksimo lo bai ta Ivanny Calvenhoven (Centro Dominguito), Archar Bernardus (Centro Dominguito), Chelo Pisas (Centro Barber), Lendell Johannes (Undeba), Michel Isidora (Jong Holland), Jhudamier Marchena (Victory Boys), Nashir Penny (Skerpene), Dudley Haddocks (Sithoc), Dexter Cicilia (SUBT), Vali Servania (Jong Colombia), Gino Gustino (Hubentut Fortuna) i tambe Reginald Martina (Vesta). Djabierne, 7or di anochi lo tin Apertura di e Torneo I lo tin e parti ofisial pa seguidamente mitar di 8, e prome partido di futbol entre timnan di Iglesia Paz na Tera I Iglesia Resurekshon di Bida kuminsa. Ta bon pa enfatisa ku durante hinter e wikent lo tin bar & kushina bon surti, mientras ku djadumingu lo tin un “screen grandi”na velt di KAE pa un I tur por wak e wega entre Cuba v/s Korsou prome, I despues mira e gran final di e torneo aki. Pueblo di Korsou kompletu ta keda invita, pa wikent proksimo, djabierne for di 7or di anochi I djasabra for di 5or bin disfruta di tur nos timnan di e diferente iglesianan, huntu ku hungadornan di FFK, den un tremendo torneo di futbol, den kual e parti mas importante lo ta pa motiva disiplina bek den Deporte di Futbol.