Willemstad – E aña aki Shamiro ta kumpli su di 5 aniversario den farandula kantando musika gospel. Pesei awor e momentu a yega ku Shamiro Anita lo bai duna su Gran Konsierto, titulá “Kalma E Tormenta”, kombina ku shownan espektakular pa laga pueblo sa ku berdat Dios ta kapas i dispuesto pa kalma kualke tormenta den nos Bida. E evenementu aki lo tuma luga djasabra, 8 di augustus 2015, den e Exhibition Hall di WTC kuminsando 7.30 di anochi. Esaki lo bai ta e evenementu ku hopi hende na Korsou tin mester na e momentunan aki.

E Gran Konsierto aki lo ta un kombinashon di shownan espektakular pa henter famia  disfrutá di dj’e. Lo bai tin kanto, musika ku ritmo varia i ekspreshonnan bunita di arte den forma di Baile, Lightshow, Dansa, SkyDancing i hopi sorpresa mas.

Hopi ta e miho gueststars, artistanan i gruponan di Kòrsou ku lo kompaña Shamiro riba e senario, loke lo hasi e evenementu aki algu uniko i bunita.

E konsierto ku show aki ta un Fundraising pa Shamiro por logra su metanan, sigui desaroya studiando musika, kumpra instrumento nesesario i sigui krea mas kantikanan positivo yena k’e palabra di Dios ku ta un bendishon pa Kòrsou.

Karchinan ya ta obtenibel na Mensing, Tik Tak, Koko Loko, Beep Beep, Kas di Beibel i Kindgdom Expirience. Preis di karchi ta solamente fl.35,– adelanta i fl.40,– na porta di WTC. Djadomingu tambe por kumpra karchi na e diferente Misanan/Iglesianan kaminda Shamiro lo presenta kantando. Kumprando karchi bo ta kopera i yuda Shamiro.

Shamiro ta invita tur hende adulto, hoben i famia kompletu pa bin biba Un brasa So di Dios, selebra Dios su amor ku por Move Tur Montaña i sinti kon Dios por Kalma E Tormenta den e konsierto aki.

Biaha pasa tur karchi di Shamiro su konsiertonan “Move Tur Montaña” i “Un Brasa So Mi Ke” a kaba for di  trempan. Pesei korda kumpra karchi for di awor. Hopi ta esnan ku ahinda ta korda kon espektakular i bendishona su konsiertonan tabata. Bin selebra e echo ku e aña aki Shamiro ta kumpli su di 5 aniversario kantando musika gospel na su estilo uniko i bunita.

Shamiro su meta ta pa su kantikanan sigui impakta mas i mas hende ku mensahenan positivo, kreando dushi ambiente di pas i bendishon prinsipalmente ku e palabra di Dios. Pesei e ta invita tur famia, amigu i kolega, grandi i chiki pa bin eksperensia kon Dios por “Kalma E Tormenta” i  ban kanta “Move Tur Montaña”, “Un Brasa So Mi Ke” i Kalma E Tormenta” tur ku tin huntu den Exhibition Hall di WTC.