WILLEMSTAD — E di dos edishon di “Curaçao Color Walk” a ranka sali djadumingu mainta dia 7 di yüni ku hopi entusiasmo. Un total di 5.000 partisipante tabata presente for di oranan trempan di mainta pa disfrutá di un warm up promé ku e kaminata kolorido a kuminsá. E aña aki atrobe tur partisipante por a marcha i baila den area di Parasasa i Mundu Nobo riba müzik di diferente “entertainers”..

Organisadónan EY Dutch Caribbean i JCI Dutch Caribbean ta sumamente kontentu i orguyoso di e reakshonan positivo riba e di dos edishon, kual a konta ku e máksimo kantidat di persona. Partisipantenan ku a tuma parti tambe a elogiá e “Curaçao Color Walk” pasó e ta un kaminata úniko for di otronan. Famianan kompletu, grandi i chikí tabata presente.

E kaminata a kulminá ku un ‘color splash’ di koló gigante na Parasasa beach ora ku tur hende pareu por a tira e puiru di koló riba otro. Kada stashon di koló a ser realisá ku sosten di algun spònser prinsipal ku a hasi e “Curaçao Color Walk” posibel, esta Maduro & Curiel’s Bank N.V, Subway, Kooyman, FunMiles, Badia Coconut Water un produkto di Pietersz Import, ACU, Dasani un produkto di Coca-Cola group, Kurason pa Komunidat i Digicel. E splèsh di koló na final tabata kortesia di Sixt i Curoil.

E tim di ‘Curaçao Color Walk’ a perkurá pa tur lokual ta nesesario pa ku limpiesa di e ruta i alabes a konta riba koperashon di tur partisipante pa por a tene e ruta mas limpi ku ta posibel. Tabatin dos kompania di limpiesa profeshonal pará kla pa kuminsá limpia e ruta for di ora e delaster persona a kaba di pasa e promé stashon. Tambe tabata tin diferente baki grandi na Parasasa beach pa resiklá tur bòter di plèstik. Na final di e kaminata a pasa limpia tur e puiru di koló kual no ta dañino pa un persona su salú ni pa medio ambiente. E puiru ta unu biológiko kual no tin impakto riba naturalesa den e area kaminda e kaminata a pasa, kual ta konsistí di entre otro mangrove. Konforme pèrmit di polis a tene kuenta ku limpiesa di e area denter di 24 ora despues di e evenemento i alabes a perkurá pa e dia siguiente hasi un segundo buelta di limpiesa pa sigurá ku tur area a haña e debido atenshon. Lo sigi monitòr e durante siman ku e ruta i area rondó di dje a keda limpi.

Un danki na un i tur ku a hasi e di dos edishon unu yen di alegria i koló i pa kontribuí na un bon kausa. Fondonan ku a ser kolektá pa medio di “Curaçao Color Walk” lo bai pa sostené Fundashon Desaroyo i Progreso ku ta guia muchanan despues di skol na 22 skol i tambe pa proyektonan pa komunidat di JCI Dutch Caribbean i EYCares.