Willemstad- E kódigo di Good Corporate Governance ta indiká ku promé ku 31 di mei kompanianan di gobièrnu mester entregá sifranan i relato anual di e aña anterior. Den kumplimentu ku e kódigo, Curoil a entregá sifranan i relato anual 2014 na e minister enkargá ku kompanianan den e kadena enérgiko, dr. Jose Jardim. E relato anual ta inkluí e.o. relato di gerensia, relato di hunta di komisario, kuentanan anual ouditá i e deklarashon positivo di Curoil su bufete di Akountent eksterno PricewaterhouseCoopers riba tantu e kuenta anual komo kumplimentu na e kódigo di Good Corporate Governance.
Ganashi
Den e relato anual di 2014, Curoil ta ilustrá ku na aña 2014, kompanianan di Curoil group (Curacao Oil (Curoil) NV, Curacao Gas (Curgas) NV, Curoil Gasstation NV, Curoil (Bonaire) NV i Curoil (Aruba) Freezone NV) den su totalidat a hasi un ganashi konsolidá di NAFl. 40 mion florin.
Un di e motibunan prinsipal pa e resultado positivo ta mará na e esfuerso grandi riba merkado internashonal pa buska mas benta, sea dor di subi kompra di klientenan eksistente i/o merkadonan aktual i buska klientenan i/o merkadonan nobo. Ademas subida di benta di low sulfur diesel pa motibu di regulashonnan ambiental (ECA), a subi benta den e area di bunkering konsiderabelmente.
Ademas despues di desèmber 2013 ku a establesé Curoil (Aruba) Freezone NV, e merkado di Bunkering na Aruba a proba su mes dor di a kontribuí na e ganashi ariba menshoná.
Ku e bahada drástiko den preis di krudo riba merkado internashonal den e di dos mitar di aña 2014, Curoil a sa di rekobrá fondonan pre-finansiá di benta di produkto petrolero riba merkado lokal i asina amplia su ganashi. Adaptashon di preis di bitumen tambe a kontribuí na e resultado positivo.
Kontribushon na kaha di Gobièrnu
Durante aña 2014 Curoil a paga dividendo riba e ganashi di aña 2012 pa un montante di NAFl. 10.4 mion kual ta basá riba e desishon di akshonista. Durante 2014 e negoshi di Curoil a aportá un total di NAFl. 81.8 mion na kaha di Gobièrnu di Kòrsou pa medio di impuesto i akseins.
Responsabilidat sosial korporativo
Den 2014 Curoil a kontinuá ku su responsabilidat sosial korporativo (Corporate Social Responsibility) i a hiba esaki na un nivel mas haltu den e komunidatnan ku e ta ópera; kaminda no solamente kontribushon finansiero ta e método pa duna bèk na komunidat, pero tambe e importansia pa e kompania pone tempu di e empleadonan disponibel, komo un kontribushon/donashon na komunidat. Den aña 2014 Curoil a kontribuí na donashon i proyekto pa komunidat pa un total di aproksimadamente NAFl. 1 mion.
Konklushon
Danki na esfuerso di tur empleado di Curoil, Curgas, Curoil Gasstations i Curoil Bonaire, aña 2014 tabata un aña eksitoso kaminda kontinuashon den mehorá efisiensia i na mes momentu sigui sigurá stabilidat di suministro lokal tabata puntonan kardinal. Maneho stringente den kobransa i kontrol riba gastunan tambe a kontribuí na efisiensia pa gastunan operashonal den su totalidat, no subi. Esaki apesar di mas aktividat komersial. Di e manera aki Curoil ta keda kompetitivo riba merkado internashonal. Pues den 2014, palabra a tradusí su mes den echonan i ku e ganashi di NAFL. 40 mion, Curoil un biaha mas ta proba di ta un kompania sólido i kapas. Gerensia di Curoil ta gradesido na su klientela lokal i internashonal pa e konfiansa.