WILLEMSTAD — Den wikènt ku ta tras di lomba, un orkesta konsistiendo di nos mihó profeshonalnan musikal, a presentá den   konsierto di Viva la Musica latina ku un elenko di tremendo kantantenan, konkistando kurason di tur esnan presente. Direktiva di AMAK ta sumamente orguyoso i  kontentu ku nos tin pais tin un kantidat di músiko ku ta dominá e arte di músika ala perfekshon i ku por duna un presentashon na nivel internashonal sin mester baha kabes pa ningun agrupashon musikal djafó. Nos ke felisitá aki nan Gregory Colina i hinter e orkesta pa a duna realse na salsanan klásiko di Kòrsou, den un forma estupendo ku a sorprendé tantu e públiko lokal komo esnan internashonal. Danki tambe na e organisadónan ku a duna espasio  pa bishitantenan djafó por a tuma nota ku aki na Kòrsou nos tin talentonan musikal di nivel hopi haltu. Esaki tambe ta motibu ku direktiva di AMAK lo sigui lucha pa músikonan lokal haña oportunidat pa duna presentashon durante konsiertonan grandi internashonal. Ta bon pa nos menshoná aki nan tambe ku direktiva ta hopi kontentu ku tin un kantidat grandi di gruponan di Entertainemnt ku durante fin di siman ta aktua den establesimentunan den Pietermaai, den Saliña i otro sitionan pa deleitá tantu públiko. Publikamente tambe nos ke gradesí aki Gobièrnu di Kòrsou i muy espesial Sr. Minister Nelson Navarro ku ta sostené e lucha di AMAK pa duna rèspèt i rekonosementu na nos músikonan lokal. Danki tambe na tur e publikashonnan ku a Sali den medionan di komunikashon kaminda a duna realse na e presentashon di e orkesta di Gregory Colina djabièrnè último. Direktiva di AMAK ta sigui konta ku un i tur pa sigui apresiá i apoyá tur nos artistanan lokal.