…ambiente cubano pa selebrá ku nos tim nashonal di futbòl…

WILLEMSTAD – Miéntras ku ta pendiente pa e wega di fogeo dia 5 di yüni próksimo kontra Trinidad den SDK; ta konsiderá esaki un aperitivo pa e kompromiso dia 10 di yüni próksimo kontra di selekshon di Cuba. Rumbo pa mundial; nos tim nashonal meresé tur atenshon i sosten. Ta huntu nos ta 12! Pa motibu di esaki Renaissance Rif Fort ta añadí un tiki sabor di Cuba p’asina hinka tur hende den ambiente di futbòl.

Riba djasabra dia 6 di yüni próksimo konsiderá Renaissance Rif Fort ekivalente na e barionan mas popular di Cuba; sintibo na Malecon, Vedado, Havana òf Santiago de Cuba. Lo transformá Rif Fort den un bario cubano pa presentá “Cubaçao Fiesta”. For di 8’or di anochi te 1’or di mardugá lo tin ‘rumba’ cubano yen di son montuno, salsa, abakuá- kuminda i bebida típiko. Igort Rivas di Tumbao Cubaçao i Gino Coelho & Co lo pèrkurá pa un anochi tropikal. Pa hinka tur hende den ambiente lo bai tin baliadónan di salsa ku lo entretené públiko ku un show tur afó. Ademas di esaki lo tin oportunidat di sera konosí ku e hungadónan di e tim nashonal di futbòl ku lo hunga kontra di Cuba dia 10 yüni próksimo.

Burger Bar, Royal Dutch Cheesery i Douwe Egberts lo ta será pa servisio di sena pero huntu nan lo operá stèntnan di kuminda i bebida durante di e anochi aki. Ta bon pa menshoná ku por kumpra kos di kome i di bebe ku ‘tokens’ ku lo ta optenibel na e ‘token stent’ den Rif Fort mes. “Nos ta deseá di duna tur hende un eksperensia ‘a la’ Havana durante di e “Cubaçao Fiesta”. Públiko no mester paga nada; pues e invitashon ta pa tur hende bishitá “Cubaçao Fiesta” i disfrutá”, esaki di akuerdo ku sra. Karen Felida di Renaissance Resort & Rif Fort. Tur esnan ku ta deseá di bishitá Ema-Tei, Steak & Ribs i Anchor por hasi esaki normal durante e anochi aki. Entrada pa “Cubaçao Fiesta” ta grátis; motibu sufisiente pa bini ku un grupo grandi i disfrutá di un tremendo anochi!