Hóben ta organisá proyekto na benefisio di mas hóben.

WILLEMSTAD — Durante e wikènt tras di lomba, studiantenan di e nètwèrk GIN (Global Issues Network), di International School (ISC), a organisá un ‘Clothing Drive’, ku sosten di Curaçao Cares. E meta di e “Clothing Drive” aki tabata pa kolektá paña nobo òf segunda mano den bon kondishon pa por duna na esnan ku mas mester di dje den nos komunidat. E meta di GIN ta pa empoderá hobenan pa pensa i ehekutá solushonan duradero riba nivel lokal, regional i internashonal pa retonan mundial. E ultimo 3 aña studiantenan di GIN di International School di Kòrsou tabata embolbí den diferente proyektonan na Kòrsou i den eksterior. E organisashon ta kere firmemente den e importansia di trabou boluntario. Ku esaki den mente, e organisashon a tuma inisiativa pa organisá su promé ‘Clothing Drive’, kaminda tur studiante di ISC por a trese paña nobo òf den bon kondishon pa hasi un kontribushon na instanshanan i personanan ku por hasi bon uso di e donashon. E hóbenan a traha aktivamente pa realisá e proyekto i a motivá otro alumnonan pa tambe kontribuí. E hóbennan a promové i organisá e ‘Clothing Drive’, regla surtimentu di e pañanan i a ‘set-up’ un ‘thrift store’ kaminda durante e wikènt ku a pasa mas di 150 hóben di 10 diferente instansia sosial tabata invitá pa ‘shop’ den un ambiente ameno. Curaçao Cares – un organisashon ku tin komo meta pa fasilitá trabou boluntario i ku ta konosí pa proyektonan manera CURA DOET i premio ‘Strea Boluntario’– a keda aserká pa sostené ISC ku e organisashon di e proyekto ‘Clothing Drive’. Ku entusiasmo nan a kontribuí; “Nos meta prinsipal ta enkurashá hobenan pa ta aktivo komo suidadano i pa kultivá embolbimentu sosial bou di hobenan.