Digicel Bonaire ta renobá su patrosinio pa di 6 aña konsekutivo:  

KRALENDIJK-SEPT; Resientemente Digicel Bonaire a renobá su patrosinio ku e organisashon di Special Olympics pa di 6 aña konsekutivo, di e forma aki siguiendo un tradishon di años ku e kompania tin- no únikamente na Boneiru sino den kasi tur merkado na unda e ta operá. “Nos muchanan spesial semper a forma parti di nos aktividatnan, nos promoshonnan, trabounan komunitario i nos kompania. E kompromiso di Digicel pa ku Special Olympics ta genuino i duradero”, esaki di akuerdo ku Srta. Irvinia Daantje, relashonista públiko di Digicel Bonaire. Digicel Bonaire su patrosinio na e organisashon ta bai kompañá ku un laso di koperashon ku ta keda sostené den transkurso di henter e aña; asina por menshoná ku e muchanan di Special Olympics ta risibí aporte di Special Olympics pa partisipá na entre otro kampeonatonan internashonal, aktividatnan di formashon personal i sosial, pero tambe por konta ku un sosten inkondishonal di maneho di e empresa. Ta konosí ku fundador di Digicel Group, Sr. Dennis O’Brien ta fiel sostenedó di e organisashon di Special Olympics mundialmente i Boneiru no ta un eksepshon. Aunke ku e fundashon ta risibí $10,000 – Digicel su aporte na Special Olympics Bonaire no ta únikamente finansiero ya ku e kompania ta partisipá aktivamente na aktividatnan di e organisashon tambe e.o e popular Walk-a-Thon ku anualmente ta keda organisá. “E meta prinsipal tras di nos patrosinio ta pa brinda nos atletanan spesial oportunidat di desaroyá den forma positivo i kultivá un deseo serka e atletanan pa destaká den nan deporte apesar di nan limitashonnan”, asina Daantje a finalisá. Riba fotonan athuntu por haña un impreshon di e momentu ku e donashon na Special Olympics a keda realisá na ofisina di Digicel Bonaire den Kaya Grandi.