Dia 21 di sèptèmber próksimo lo hasi Playa Canoa i e kaminda pa Ronde Clip limpi limpi!

WILLEMSTAD-SEPT: Na momentu ku e proyekto di Curaçao Clean Up a keda lansá, Digicel a pensa ku lo tabata un bon idea pa uni forsa i adoptá Playa Canoa i besindario komo área di limpiesa. “Komo empresa nos a bin ta konsientisá nos komunidat riba limpiesa i medioambiente, resientemente nos a pone akshon tras di palabra aktivando nos panelnan solar. Via di e proyektonan di Bario Ekstraordinario, nos ke motivá nos hendenan pa krea un sentimentu komunitario i yuda otro p’asina huntu nos por tin un mihó komunidat, esei ta e motivashon tras di nos aporte komo empresa na e akshon di Curaçao Clean Up”, esaki di akuerdo ku relashonista públiko pa Digicel Kòrsou, Thessa Fleming. Resientemente Digicel a tene un seshon informativo ku su empleadonan, na unda ku a dekorá e ofisina ku sakunan di sushi p’asina inspirá un mentalidat di ‘limpiesa’. Despues di esaki, empleadonan a haña oportunidat pa inskribí nan mes, famianan i boluntarionan pa huntu partisipá na Curaçao Clean Up. Digicel a adoptá Playa Canoa i e kaminda ku ta kondusí na Ronde Clip; durante di e limpiesa lo tin entretenimentu musikal i lo rifa premio entre tur boluntario. Klientenan tambe por yuda durante di e limpiesa, por inskribí dor di manda un mensahe ku nan nòmber i number di telefon via di e página di Facebook di Digicel. “Nos ta invitá pueblo di Kòrsou pa partisipá den e akshon di Curaçao Clean Up dia 21 di Sèptèmber próksimo i huntu hasi e limpiesa nashonal un éksito”, asina Fleming di Digicel a tèrminá. Riba fotonan athuntu, momentu ku e seshon informativo tabata tumando lugar i tambe partinan di e área na Playa Canoa ku lo wòrdu limpiá dor di Digicel durante di e Curaçao Clean Up!