Willemstad – Djadumingu awor 24 di mei riba tereno di Santa Barbara Golf & Beach resort lo zona e tiru pa komienso di e di 5 edishon di ENNIA Curaçao International Triathlon. Kaminda apénas 5 aña pasá e partisipantenan tabata purba kompletá e triatlòn dentro di 3 ora, e biaha  akí nan ta bai lucha pa yega final dentro di 2 ora i 30 minüt. Gaetan Fetaud for di Fransia, ganadó overòl di aña pasá, pronto lo yega Kòrsou pa defendé su título djadumingu próksimo. E aña akí tambe Curacao International Triathlon ta primintí di bira un tremendo evento. E distanshanan ta landamentu 1,5 km, kareda di baiskel 40 km i  korementu duru 10 km. Banda di esaki tin kompetensha pa e kampionato di Kòrsou ku un kategoria apart pa hende hòmber i muhé. Interesadonan por partisipá komo individuo òf den tim. Komo individuo nan ta hasi tur 3 parti di e triatlòn. Den tim tin un partisipante ku ta landa, unu ku ta kore baiskel i unu ku ta kore duru. Atrobe grandi i chikí ta partisipá na e evento. E partisipante mas hóben, Gijs Hendriks tin 15 aña i ta partisipá den un tim di relay. Tambe tin 2 partisipante riba 60 aña: Philip Clift di Grenada i Ruben Suriel di Kòrsou. E ganadónan di ENNIA Sprint Triathlon 2015, Marlies Kort i Jeritsandro Martine tambe lo kompetí. ENNIA Sprint Triatlhon a tuma lugá den aprel na Kokomo Beach. Hopi partisipante ta konsiderá e evento ei un oportunidat pa kalentá pa e evento internashonal. Komienso di e kompetensha ta mitar di shete mainta i entrega di premio ta alrededor di 11or mainta. Tur hende ta bon biní pa bin apoyá e partisipantenan. Despues di otorgamentu di premio partisipante-, boluntario- i fanátikonan por sigui disfrutá riba playa. Entrada ta grátis. ENNIA pa di 5 aña konsekutivo ta spònser prinsipal di e evento internashonal akí. Tambe e organisashon ta hopi agradesido na Santa Barbara Golf & Beach Resort, Mijnbouwmaatschappij, Nederlandse Strijdkrachten, spònser di bibida Powerade i pa finalisá tur boluntario ku a mèldu. Ta tur partidonan ta hasi posibel pa organisá un evento asina akí. Pa mas informashon tokante e programa, bishitá www.triathlon-curacao.com òf www.tectriathlon.com.