WILLEMSTAD —  E siman aki e kompania di aviashon lokal AVA Airways ku ta pendiente pa risibí su pèrmit ekonómiko a firma un akuerdo  ku Star Motors pa kompra di  no menos ku 10  SUV HAIMA S5, invertiendo di e forma ei mas ku 430 mil florin den ekonomia di Kòrsou. Manera nos a bin ta informá, AVA Airways ta un proyekto di un kompania nobo i moderno ku e solo meta pa duna un man den e ekonomia malisimo ku Kòrsou ta pasando aden i na e mes un momentu trese mas alternativa pa e biahero lokal komo internashonal. Apesar ku na opinion di AVA Airways nan a entrega tur dokumento ku leinan lokal ta eksigí, tog a informá ku mester aklará un aspekto finansiero, loke lo bai sosodé tambe. Den kuadro di preparashon di  su proseso pa  tin tur kos in place aki na Kòrsou, resientemente AVA Airways a firma un kontrato ku Star Motors pa kompra di e 10 vehíkulonan modelo SUV, HAIMA S5, ku lo ta vehíkulo pa e  personal di staf dje kompania. Kada un dje vehíkulonan aki lo keda di brandt den AVA modèl pa asina ei e ta rekonosibel rònt Kòrsou. E determinashon di esnan na kabes pa establesé AVA Airways na Kòrsou ta unu determinante, pasombra esaki ta nan derecho komo suidadano i nan ta determiná pa sigui ku e proseso aki, apesar di tur kontra tiempo i opstákulonan ku ta keda pone den kaminda, pasombra na final di tur kos, e proyekto aki ta pa  e desempleado hóben ku awe ta para na 37% i pa e tata i mama desempleá ku ta riba 13% ku no tin un speransa. AVA Airways ta sumamente kontentu ku Gerensia di Star Motors meskos ku hopi otro instansia, ta kere den e proyekto i a yega na un akuerdo ku AVA Airways pa kompra di e 10 vehíkulonan aki. AVA Airways ta kere den Kòrsou i p’esei ta traha ku un agensia di outo lokal.