E grupo di karnaval nobo HELENGUE ”TA NOS TIN E AMBIENTE”, ta bai kibra tur loke ta espektativa di un grupo di karnaval. E grupo ta inovativo, moderno i kreativo ku ta para pa “Union i Pas den komunidat pa asina nos sera e kadena di union aun mas durante e Marcha di karnaval”. Djamars 26 di mei 2015, HELENGUE ta bai demostrá e trahe ku nan ta debutá den gran marcha 2016. Helengue ta e úniko grupo di karnaval ku a sa di kibra rekòrt di oudiensia na e promé reunion ku tabata 1 luna despues di karnaval 2015. E lider di Helengue ta nos artista internashonal Danny Yanga ku e último 12 añanan tabata establesé na Europa dunando shownan grandi ku hopi artistanan fama mundialmente, tambe protagonista pa e.o. Disney’s The Lion King i The Wiz i varios top musicalnan den Europa.

Danny Yanga ta un di nos artistanan ku ta konosé pa su propio shownan luho i ku hopi atenshon riba detaye i ta esaki e artista ke logra ku su grupo di karnaval Helengue. Debí ku e interes aki na Kòrsou ta hopi grandi pa e grupo Helengue, tin un kantidat di karchi selektá pa tur persona ku ta interesá di Helenguiá den karnaval ku Helengue pa por tei presente i por disfrutá di un bon show i alabes atmirá e kreashon ku Danny Yanga a diseñá pa e grupo. E trahenan ta bai ta hopi bunita pero ku atenshon ku bo por baila i jump den karnaval i sin tene kuenta ku un trahe ku por minimalisá bo di gosa di bo karnaval ku HELENGUE. E anochi aki ta duna bo e sintimentu ku bo ta den karnaval i e team di Helengue ta traha duru p’abo por haña un ñapa di loke bo ta sinti dia 7 i 9 di febrüari próksimo den nan debut den karnaval 2016 i ta p’esei nan ta bai “Full Ekipá” ku e banda i e DJ ku ta kompañanan den marcha ku ta Dolce i RO-1. E tema p’e debut ta “Jembers Fashion Carnaval” ku ta un tema di Indonesia ku ta glamour kombiná ku fashion ta topa ku karnaval. Si bo ta interesá di Helenguiá ku HELENGUE den karnaval 2016 bo ta kordialmente invitá pa por presensia e magno evento show di HELENGUE na District 1850 na Scharloo djis patras di the Movies dia 26 di mei próksimo pa 8’or di anochi. Bo ta interesá di bai den marcha ku Helengue? Awèl dia 20 di mei entre 17:00 pa 20:00 bo por pasa tuma bo karchi GRATIS na WTC pa asina bo presensia i mira loke abo ta bai jump kuné den kaya durante karnaval. Bo mester tin bo karchi pa bo por drenta. Tur hende ku a inskribí kaba tin preferensia, pues si abo no a inskribí ainda bo por hasi esaki i pagando bo inskripshon di Fls 50.- dia 20 di mei i risibí bo karchi mesora. Pa mas info por yama Danny Yanga na 5213700 pa mas informashon i alabes por App tambe. Den Helengue bo ta haña trato, ambiente, Gym i guia di nutrishon pòrnada i hopi mas. Like nos page di Facebook Helengue pa bo por mira tur loke ta informashon di e grupo ku ta bai trese kambio den karnaval. HELENGUE “TA NOS TIN E AMBIENTE.