WILLEMSTAD – Un tim di representantenan di  50HoursLIve a anunsiá durante di un konferensia pa prensa ku a tuma lugá na  Wet’n Wild e plannan pa e di tres edishon di e mega-evento aki.  Durante di 50HoursLive, ku lo tuma lugá e aña aki riba 5-6-7 yüni, un biaha mas lo rekoudá fondo pa kompra di ünifòrm i artíkulo pa skol, pa e aña eskolar benidero pa muchanan di kua nan mayornan no por paga e nesesidatnan esensial aki.  Banda di esei lo rekoudá fondo tambe pa e (Rotary) Moving Forward project, ku ta un programa ku ta ofresé fasilidat di kaminda di studia tra’i mèrdia na studiantenan di e di kuater aña di un skol VSBO. E proyekto aki lo finansiá alabes guia profeshonal nan e studiantenan pa nan por traha nan tareanan di skol te na momentu di hasi nan eksamennan. Alabes lo duna atenshon durante di e evento  50HoursLive! riba importansia di Bloedbank Curacao. Hendenan por bishitá e evento i hasi donashon òf por hasi uso di otro medionan pa hasi donashon. Riba podio tin un mashin ku ta indiká konstantemente durante di e programa kuantu sèn a rekoudá. For di djabièrnè 5 di yüni – 17.00 ‘or lo duna inisio na un programa di radio bibu ku lo tuma  lugá den un studio di glas riba playa na Wet’n Wild. Riba playa lo tin alabes diferente otro aktividat interesante. Bishitantenan por disfrutá di presentashon di artistanan lokal i internashonal. Muchanan por kumpra ‘strippenkaart’ ku kua nan por pasa ratunan kontentu den atrakshonnan manera  e Tsunami Slider, Dunk Pool òf laga pone un 50HoursLive tattoo. Un aktividat ku tur aña ta bini bèk i ta hopi popular ta e ‘Sintamentu riba Palu’ (Paalzitten). Representantenan di sinku organisashon ta kompetí pa keda sinta mas largu posibel pa rekoudá sèn pa nan organisashon.   E ganadó ta risibí NAfl. 10.000. Por inskribí pa e kompetensia aki te 29 di mei. Tur informashon ta riba e página di evento di 50HoursLive Curacao riba Facebook of  www.rotarycuracao.org Banda di e aktividatnan di dia 5-6-7 yüni  50HoursLive ta organisá un ‘subasta’ dia 23 di mei na Golf & Squashclub Emmastad. Lo tin un torneo di gòlf den estrecho kolaborashon ku Santa Barbara Plantation i SFT na Santa Barbara Plantation dia 30 di mei. Via e página riba Facebook di 50HoursLive Curacao tur hende por keda altanto di e programa i otro informashon manera kua ta e oranan ku konsiertonan ku ta tuma lugá. Un informashon di avanse, tin konsiertonan di entre otro; van KY3 di Venezuela, the Curacao All Star Band i Levi Silvanie.  E último aki lo perkurá alabes pa programanan edukativo pa mucha. 50HoursLive ta posibel danki na un kolaborashon entre Rotary Club Curacao i kompanianan partner den media Dolfijn 97.3 FM, TCFM 93.3, Radio Hoyer 1 & 2, Radio Direct Live 92.1, Radio Rock Kòrsou 88.3, TDS Channel 26, RTV-Holland en Telecuraçao Kanal 8. “Aña pasá ‘50HoursLive tabata un éksito rotundo ku hopi ambiente. E aña aki nos lo perkurá pa e mesun dushi ambiente durante 50 ora konsekutivo di programa bibu i mas ku turk os ta spera di por konta ku komunnidat kompletu pa rekoudá un suma grandi pa por finansiá e proyektonan di bon kousa ku nos a menshoná, ” vocero di e organisashon a bisa ku hopi entusiasmo.