Willemstad – Djadomingu 17-mei-2012 lo tin Estreno i Debut di e álbum nobo di Shamiro Anita, titulá “Kalma E Tormenta”. E Estreno i Debut aki lo tuma lugá den e sala “Tula Room” na “Hotel Kura Hulanda” di 7or pa 9or di anochi. Lo tin presentashon di Shamiro ku kanto, baile, videoclip i lo bendishona su CD nobo yamá ‘Kalma E Tormenta’. E aña aki Shamiro ta kumpli 5 aña kantando su estilo uniko di músika gospel. Despues su 4 álbumnan sumamente bendishoná titulá ‘Move Tur Montaña’, ‘Un Brasa So Mi Ke’, ‘E Regalo Perfekto’ i ‘Solo Un Abrazo’, e hóben kantante Shamiro Anita a lansa su bunita kantika nobo titulá ‘Kalme E Tormenta’. Awor e lo debutá su di 5 álbum ku tambe ta titulá ‘Kalme E Tormenta’. Den 5 aña e hoben aki a logra produsi 5 álbum, loke no ta nada fasil. Pesei Shamiro ta gradisi Dios na prome luga i tambe tur esnan ku a yud’e i sosten’e den e periodo aki. Den bida tin momentunan ku nos tur por paso den situashon manera un tormenta. Ku e álbum nobo aki Shamiro ke enkurashá nos tur pa stima otro, disfruta di bida i pa no spanta den situashon difisil, paso Dios lo Kalma E Tormenta. Hopi ta esnan ku ta komentá kaba kon e kantika ‘Kalma E Tormenta’ a konsolá nan den situashonnan tristu i doloroso. Shamiro su deseo ta ku esaki lo sigui sosodé pa tur hende ku skucha e album nobo. Ta premira ku den poko tempu e kantika aki ‘Kalma e Tormenta’ tambe lo bira un hit den e Tòp di músika na Kòrsou. E álbum nobo lo tin mayoria kantikanan na Papiamentu ku 1 na Spañó i 1 na Ingles. Lo tin kantikanan estilo di ‘Move tur Montaña’, ‘Un Brasa so mi Ke’ i Kalme E Tormenta” den kombinashon ku otro ritmo i estilonan nobo pa Shamiro. Esaki ta un dushi sorpresa pa tur ku skucha Shamiro su kantikanan nobo. Riba e CD nobo lo tin un POESIA di Shamiro ku palabranan poderoso komo un mensahe di Dios. Esaki ta hasi ku e CD nobo aki ta bale la pena pa skucha. E Álbum mes lo bai ta un edishon presioso i úniko. E letranan lo bai ta optenibel riba Shamiro su website. Debut di e produkshon nobo aki lo bai den kombinashon ku Estreno di e Videoclip nobo. Durante di e seremonia lo introdusí i bende e CD nobo aki i por laga Shamiro firm’e mes ora. Ku hopi alegria Shamiro i henter su famia ta invitá pueblo pa bin selebrá i disfrutá di su kantikanan nobo djadomingu 17 mei 2015, paso su meta ta pa impaktá tur hende ku skucha su músika ku un mensahe prinsipalmente ku e palabra di Dios. Entrada ta pornada i espektativa ta ku e sala lo bai ta yen yen. Ta rekomendabel pa ta trempan. Pa mas informashon por email anita_miro@hotmail.com of whatsapp/yama Tel: 5622233. Riba e kombinashon di potret por mira Shamiro durante un evento.