Preis di 1 anochi 100 florin i 2 anochi pa unikamente 175 florin

WILLEMSTAD, Kòrsou: E aña akí dia 15 di Mei próksimo ta kumpli 100 aña di industria petrolero na Kòrsou i 30 aña di Refineria Isla/PdVSA operando nos refineria. Refineria Isla “Ku Kurason pa Komunidat” ta kontribuí pa henter pueblo por disfrutá di e gran Concierto “Viva la Musica Latina Curaçao 2015 pagando un tarifa super spesial. Despues di un fin di siman masha eksitoso Branding Partners, Licores Maduro ‘The Store’, Kuster’s Trading (Polar) i Scarlet a hasi un opsekio spesial na tur mama di Kòrsou via diferente kampaña masha atraktivo ku e karchinan di Viva La Musica Latina. I awe ta Refineria Isla, un otro Branding Partner mas di “Viva La Musica Latina Curaçao 2015” , den estrecho koperashon ku SHOWBIZZ, ta prolongá oferta di e preis spesial debí na e reakshon grandi di públiko.

“Nos a sinti ku públiko ta kómodo ku e preisnan den promoshon; naturalmente ora ta proyektá pa realisá un evento di e taya akí e promé pensamentu ta pa kubri tur gastu. Ta un evento grandi na presupuesto, grandi na organisashon, grandi den tur sentido. Loke nos ta deseá sinseramente ta un parkinglot di Sambil yen di fanátiko, loke efektivamente kada un di e artistanan ta fèrwagt tambe.”, asina Steve Hudson di SHOWBIZZ International a mustra. “Ophetivo di e proyekto musikal akí ta pa kontribuí na turismo di Kòrsou, demostrá diversifikashon di evento, keda posishoná nos pais komo un isla di evento musikal di kalidat haltu i naturalmente krea un ‘spin-off’ ekonómiko pa henter e sektor di Horeca i ofresé nos hendenan aki na ‘kas’ un espektákulo diferente!”.

Preparashonnan ta bayendo den full swing pa Kòrsou risibí e promé edishon di “Concierto Viva la Música Latina Curaçao 2015”.

Despues di e apertura ofisial riba djabièrnè lo sigui ku e aliniashon estelar di artista ku lo presentá, manera Gregory Colina i su orkesta, Gilberto Santa Rosa, Grupo Guaco de Venezuela i Jorge Celedón. Djasabra 30 di Mei lo tin presentashon di Olga Tañón, El Gran Combo de Puerto Rico, José Alberto El Canario i Alberto Barros. Tur artista lo duna nan presentashon riba e mesun esenario, pues ta trata realmente di un gran konsierto unda kada artista lo duna un show di 90 minüt. Portanan di SAMBIL Curaçao ta habri for di 6:00 pm, pa 7:30 pm en punto “Viva la Música Latina Curaçao 2015” kuminsá.

Probechá di e Promoshon: Entrada pa e konsierto ta Naf 100,= pa un anochi i Naf 175,= pa ámbos anochi i karchi ta optenibel na Norsa NV, Albert Heijn Zeelandia, Van Den Tweel na Jan Thiel, Pizza Hut (tur 4), Pòmpstashon VANDDIS (tur 7 filial), C-Post (tur 5 filial), Scarlet, Bruna, Amigoe, Funmiles i Mensing’s Caminada.