Na okashon di 9 luna di su fayesimentu

Willemstad – Djabièrnè dia 8 di mei na okashon di 9 luna di fayesimentu di e rei di Parke Tropikal, e leon KING, señora Audrey Leonora a hasi entrega di un obra di arte di mozaik. Audrey Leonora di Mosaic By Ozon ta un artista ku ta traha diferente piesa bunita di mozaik i kier a honra di un manera simpel pero bunita e leon King ku tabata asina kerí pa grandi i chikí. Señora Leonora ya tin 6 aña ta traha obranan di arte di mozaik, duna les i ya kaba e tin sinku eksposishon riba su nòmber. Mariela Romero, sekretaria di direktiva di Fundashon Parke Tropikal, a risibí ku sumo plaser e obra di arte for di man di señora Leonora i a gradisí’e pa e bunita gesto i e amor ku ela traha e obra di arte aki pa parke. King tabata hopi keri i despues ku ela fayesé dia 8 di ougùstùs 2014 a basha e kouchi abou i a hasi e area un plasa ku a duna e nòmber di King’s Plaza. Awor e obra di arte aki lo haña un luga bunita asina un i tur ku bishitá e parke ta korda riba e rei di Parke Tropikal, KING. Parke Tropikal ta pone diferente aktividat riba King’s Plaza manera entre otro e tan gustá Zoovie Picnic Night di tur promé djasabra di luna.