Willemstad – Curaçao Footprint Foundation huntu ku Grupo Biná ta organisá riba dia 9 di mei un kaminata den e área di naturalesa di Vaersenbaai den direkshon pa Bullenbaai parti mainta. Bin disfrutá di naturalesa I e lus di solo mainta trempan riba e dia aki. E kaminata ta kuminsá 07.00 or di mainta i e grupo lo reuní for di 06.45 or di mainta riba e lugá di parker na Vaersenbaai (Kokomo).

E kaminata aki ta pasa un kaminda riba baranka di kalki den direkshon di Bullenbaai. Na kaminda nos tin bunita bista riba e klipnan i tambe laman. Kantu di e kaminda por haña vários mata ku ta keda bèrdè henter aña, i ku ta típiko pa piedra di kalki. Tin 3 seru basta difisil pa subi i baha. Pa e motibu aki e kaminata aki no ta pa hende ku miedy pa haltura.

E ruta lo tuma 3 ora e gastu ta 20 florin pa persona ku ta inkluí un kos di bebe, fruta fresku i ob. Ta importante pa bisti sapatu pa kana fuerte, un pèchi i bin ku awa adishonal pa bebe durante e kaminate I tambe krema pa evitá kimá di solo. E kaminata ta riba propio riesgo.

Nos ta kana ku grupo chikitu i pa e motibu aki inskripshon ta nesesario. Por inskribí dor di yena e formulario di inskripshon riba e website www.curacaofootprint.org of dor di manda un mail pa info@curacaofootprint.org.