…Dianan 7, 8 i 9 di mei próksimo…

WILLEMSTAD – Kòrsou ta pendiente pa Curaçao International BlueSeas Festival. Un festival ku lo duna realse na e género musikal di Blues i Jazz, alabes sirbi komo un plataforma perfekto pa rebibá e estilo musikal aki manera a hasi durante di añanan ku festivalnan di salsa, jazz, músika merikano i europeo. Renaissance Resort Curaçao komo ‘kas’ pa e artista i músikonan internashonal ku ta di bishita ke kontribuí na e eksperensia total di Curaçao International BlueSeas Festival. Pesei riba dianan 7, 8 i 9 di mei próksimo Renaissance Mall i Rif Fort ta introdusí su anochinan dediká na e género musikal Blues i Jazz.

Tur amante di Blues i Jazz ta keda invitá pa bishitá Renaissance Mall i Rif Fort pa eksperensiá músika di un manera diferente i úniko. Kuminsando for di djaweps 7 di mei lo tin entretenimentu bibu di Gilmar Fraites for di 7:30pm te 10:30pm. Manera semper Gilmar lo tin un repertorio spesial ku lo kubri tur e hitnan musikal ku un toke di Blues i Jazz. Riba djabièrnè, Renaissance Mall i Rif Fort lo ta anfitrion pa Gino Coelho i su amigunan kende lo ta riba esenario di 7:30pm te 10:30pm. Pa klousurá e siman di Curaçao International BlueSeas Festival lo tin presentashon di Loading Band kompañá pa Ephrem J di 7:30pm te 10:30pm. Ephrem J ta otro di nos artistanan lokal multi talentoso ku eksperensia amplio riba tereno di Blues i Jazz. Pues dianan 7, 8 i 9 di mei bo tin un sita ku Renaissance Mall i Rif Fort. Bini kubo grupo di amigu/amiga i disfrutá di un anochi yená ku bon ambiente, dushi kos di kome, tremendo kos di bebe i hopi Blues i Jazz.