WILLEMSTAD – Djaluna ku a pasa e ofisina lokal di organisashon Business Serenity huntu ku e kompania Merikano Fusionstorm a transformá e plenchi di Oranje School den un kurá di hunga hopi kolorido i interaktivo pa e muchanan. Esaki ta forma parti di e programa di biahe di Fusionstorm ku e siman aki ta di bishita na nos isla ku un grupo di 97 trahadó i nan famia. Tur aña Fusionstorm ta organisá un biahe di rekompensa pa su empleadonan na un destinashon kaminda ta hopi importante pa nan desplegá aktividat na benefisio di e komunidat atraves di un proyekto di boluntario. E aña aki nan ta bishitá Kòrsou i nan a pidi yudansa i ekspertisio di Business Serenity pa hink’é den otro i kordiná e proyekto. Despues ku a kombiná e lushiklas ku e klasnan mas haltu di Oranje School, e muchanan mas chikitu no tabatin niun kaminda mas pa hunga; esei tabata pidi pa un kambio.

Pintura mural

E proyekto tabata un tremendo éksito kaminda e turistanan Merikano huntu ku e muchanan di Oranje School a pasa un dia dushi, plasentero i produktivo. Durante dia nan a fèrf, koba i konstruí, i nan a envolví tur e muchanan di Oranje School. Kada un a pone imprimí figura di nan man riba un pintura di muraya ku ta duna un bista nobo na e plenchi di skol. E muchanan chikitu di Oranje School awor por deshogá entre otro ku un rèki pa subi, un wep,un toren di tayer, un swingset kompleto i un baki di santu. Pa akabá nan a planta tambe palu di dreifi di Kòrsou komo símbolo di kon e muchanan i Oranje School ta sigui krese.

Partnernan

E kompania di organisashon Business Serenity normalmente ta konsentrá riba plania i ehekutá di A pa Z programanan di biahe di kompanianan ku ta bini Kòrsou, i organisá evento i aktividat di teambuilding riba merkado lokal. Den e kaso aki nan a haña hopi importante pa pone nan konosementu i eksperensia disponibel i asina duna nan aporte na plania i kordiná e proyekto aki pa komunidat. Business Serenity ta gradisí tur e partnernan ku a yuda realisá e proyekto aki, manera Bonsai, De Jongh’s Sporthuis NV, Hot Wheels Tire Center, Mijnmaatschappij Curaçao BV, Rent-it-All, Bianca Scheepbouwer i Sophros Catering.