Djasabra último Prinses Wilhelmina Fonds a tene un interesante Open House ku e meta pa sera komunidat sera konosí di aserka ku e organisashon. Konsiderando ku e organisashon ta den su luna di kolekta, Prinses Wilhelmina Fonds a konsiderá nesesario pa mustra komunidat, ta na unda i kon nan ta invertí tur e fondonan ku nan ta risibí. Un kantidat basta grandi di persona a bishitá e organisashon i nan por a opservá pa nan mes tur e trabou ku PWF ta hasi pa e pashèntnan di kanser di Kòrsou. Tabatin diferente presentashon, bishitantenan por a sera konosí ku e sala di Rekreashon i Terapia di PWF alabes mira e obranan ku e klientenan ta traha i tambe nan a risibí un guia i splikashon di tur lokual e departamentu di prótesis i bh-speshal ta ofresé. E mainta aki a keda habrí ku un akto hopi speshal ku a keda realisá pa señora Emily de Jongh-Elhage. Durante henter luna di sèptèmber tur persona ku bishitá e ofisina di Prinses Wilhelmina Fonds i hasi donashon, ta risibí un kurason, riba kua nan por dediká un mensahe o deseo pa un famia o konosí ku ta sufri di kanser i kologá esaki den un palu speshal ku PWF a krea pa e okashon aki. Tur persona ta bon biní pa bin skibi nan mensahe o deseo i pone esaki den e palu. Prinses Wilhelmina Fonds ta hopi satisfecho kon e Open House a desaroyá i ke invitá henter komunidat na un interesante eksposishon di pintura di su klientenan, ku ta tuma lugá dia 19 di òktober di 10.30’or di mainta pa 2’or di mèrdia na Landhuis Bloemhof. E pinturanan ta na benta. Pa mas informashon por tuma kontakto ku Prinses Wilhelmina Fonds na telefòn 461-1998 of bishita nan Facebook-page www.facebook.com/pwfcuracao