Djarason 15 di aprel último na Nassau Bahamas, federashon di nort i sentro Amerika ku asosiashon di futbòl di Karibe (CONCACAF) a anunsiá ku nan lo introdusí tres baluarte na nan salon di fama. Kada un di e baluarte nan aki a hasi i a nifiká hopi pa e deporte futbòl na nan respektivo paisnan. E baluarte nan aki ta Rafael Callejas, Presidente di e Federashon Nashonal Outónomo di Futbòl di Honduras (FENAFUTH); Andres Constansia, un hungadó renombrá i ehekutivo di Kòrsou i Aaron Padilla, un hungadó ku a destaká i ku a duna un gran kontribushon na e desaroyo i kresementu na futbòl di Mexico. CONCACAF tambe a otorgá e premio ‘The President’s Award’ na Mexico i Merka pa nan medayanan di oro optené na torneonan olímpiko di futbòl femenino i maskulino na 2012. “E salon di fama ta e okashon perfekto pa homenahiá personanan prominente manera Rafael Callejas, Andres Constansia i Aaron Padilla, di kua kada un ta tin un gran impakto riba e historia di e deporte i nos federashon.” Vise presidente di FIFA i Presidente di CONCACAF, Jeffrey Webb a bisa. “Sea riba òf pafó di tereno, nan pashon, dedikashon i gran espíritu pa e bunita deporte, ta atmirabel pa CONCACAF i ta netamente esei a yuda engrandese e futbòl di region i a pone te kaminda e ta awe.” Webb a sigui bisa. “Mi tin sigur ku nan tremendo trabou lo sigui inspirá pa engrandesementu di e deporte” ela terminá bisando. Presidente Webb, den presensia di Presidente di FIFA Joseph S. Blatter, a entrega e galardon na kada un di esnan homenahiá. Ku e atkisishon di Callejas, Constansia i Padilla, e salon di fama di  CONCACAF a krese i ta konsistí di 36 miembro total. E seremonia a konta ku presensia di diferente figuranan di futbòl riba nivel internashonal. Luis Figo, Prince Ali bin Al-Hussein i Michael van Praag, tabata algun di e invitadonan den e gran kantidat di personanan ku asistí e evento. Biografia di nos kandidato pa salon di fama; Andres Constansia: Andres Avelino Constansia a nase na Kòrsou dia 10 di novèmber di aña 1936. Mr. Constansia a traha inkansablemente na bienestar di futbòl pa mas ku 50 aña. Ela kuminsá komo un hungadó di Jong Colombia pa despues e forma parti di e kuerpo tékniko i direktiva di su ekipo stima. Bou di su guia i supervishon, Jong Colombia a logra diferente titulo di kampion den kampionato di futbòl di Kòrsou i Antia. Bou di presidensia di Mr.Consansia, Jong Colombia a bira kampion na dos okashon di Karibe. Banda di su dedikashon i empeño pa e desaroyo di futbòl na Kòrsou, Mr. Constansia a fungi komo presidente di FFK i NAVU, e tabata un miembro di direktiva di ‘Caribbean Football Union’ i tambe e tabata forma parti di e komishon finansiero di FIFA.     Tambe Mr. Constansia a keda introdusí na salon di fama di federashon di deporte di Kòrsou. Esaki ta un resúmen chikí di tur e trabounan ku Mr. Constansia a hasi pa futbòl. FFK ta kontentu i orguyoso ku Mr.Constansia a keda rekonosé pa su tremendo trabou desplegá den nos futbòl lokal i internashonal. Masha Pabien y que sigan los exitos!