For di dia 23 di aprel Curassavica N.V. ta organisá e kurso di Geologia di Kòrsou un biaha mas. Tur hende ku tin interes den naturalesa en general i proseso geológiko en partikular, tambe den relashon ku turismo, edukashon, konstrukshon, arkeologia i mas, ta haña den e kurso aki informashon básiko balioso di e materia aki. E kurso aki ta forma parti di e kurso kompletu di Guia di Naturalesa, pero interesado por partisipá na e parti di Geologia kome un kurso separá tambe (sin sigui e otro partinan). E formashon di mundu i e prosesonan geológiko ku a yuda form’é te ku lo ke e ta awor aki semper ta parti di imaginashon di hende. Tambe pa motibu ku e prosesonan geológiko aki te ainda ta tuma lugá i asina ta kambia e pareser di nos planeta kada biaha. E fundeshi geológiko di Kòrsou ta responsabel entre otro pa e ekologia di e isla, i tambe ta duna e pareser físiko di nos isla. E temanan ku lo trata durante e kurso ta:

– Prinsipionan básiko general di geologia, piedra i mineral;

– Prosesonan geológiko grandi (manera ‘Platentektoniek’);
– E gruponan di piedra di mas importante riba nos isla i nan karakterístika;
– E historia geológiko di Kòrsou.
Lo sera e kurso ku un ekskurshon den kua lo mustra e diferente grupo di piedra na vários lugá. Geólogo Drs. Leon Pors lo ta e dosente di e kurso ku ta konsistí di 5 lès di teoria riba dia 23 i 30 di aprel, 7, 14 i 21 di mei di 18.30 te ku 21.00 or, i un ekskurshon riba dia 23 di mei di 08.00 pa 16.00 or. Partisipashon ta kosta Naf. 290 pa persona ku ta inkluí material, snack, kòfi ku te i un lunch durante e ekskurshon. E preis ta inkluí 6% ob. Inskripshon ta posibel pa medio di e formulario riba e website www.curassavica.net bou di e sekshon di Kurso di Guia di Naturalesa (cursus Natuurgids). Pa mas informashon por yama 522-8289 of manda un mail pa info@curassavica.com.