“Bailemos otra vez…”

WILLEMSTAD, Curaçao 2015: Jose Alberto “El Canario”, salsero di kurason, dominikano- pero for di chikí residensiá na Puerto Rico ta den gran preparashon pa su presentashon dia 30 di mei próksimo den Viva La Musica Latina. Den añanan ’70 Jose Alberto a risibí atenshon internashonal komo lider di e banda Tipica 73. Na 1983, e’la lanta su propio orkesta i a bira un strea latino ku renombre internashonal, sigur despues di su kompakto debut, ‘Noches Calientes’. Na 1991, e produkshon ‘Dance With Me’ a pèrmití e kantante establesé un estilo diferente den salsa, algu ku e’la yama ‘salsa romántiko’.  Klásikonan manera “Sueño Contigo”, “Bailemos Otra Vez (Que paren el reloj)” ta piesanan ku ta hasi un artista manera Jose Alberto “El Canario” un artista di salsa sensashonal! Su nòmber di kariño, “El Canario” e’la risibí dor di su abilidat ekstraordinario di flùit den forma melódiko, su fanatikonan mesora a kuminsá kompará su flùit ku un kanari.  Miéntras e ta krese artístikamente, e nòmber di kariño a pega te ku e’la bira su nòmber ofisial. Su éksito ta sin límite, hibando e género musikal di salsa pa kontinentenan stranhero; Merka i Oropa ta enkantá ku e artista aki! Latinoamérika inkluyendo Sto. Domingo, Puerto Rico, Perú, Venezuela, Panamá i Ecuador ta paisnan ku regularmente ta disfrutá di e músika di Jose Alberto “El Canario”.  E tin mas di 36 aña den farándula, pues realmente un klásiko, un galan den e género musikal.  Ganador di diferente premio Billboard Latino den kategoria Salsa Tropical/ Latin Airplay. Un diskografia ku ta konta for di 1991 pa 2001, despues di 10 aña e ta saka un otro produkshon- na 2011 i na 2012 titulá “Íntimamente Salsa”.  Dia 30 di mei, bisti bo sapatu di baile, Jose Alberto “El Canario” lo ponebo baila sin ke stòp!