Aruba,-Den luna di juni Aruba lo cera conoci cu un festival musical di dos dia caminda lo bay tin un variacion grandi di musica pa tur genero. Loco Lobo Productions hunto cu Sd Concerts y Aruba Tourism Authority ta preparando pa e promer Aruba Summer Music Festival cu lo bay tuma lugar dianan 26 y 27 di Juni 2015. E magno festival aki lo bay tuma lugar den e Harbour Square Arena, unda e concierto di Marc Anthony a wordo teni. Lo conta cu presentacion di artistanan di taya internacional hunto cu nos artistanan y bandanan local. Ta spera hopi fanaticonan tambe di exterior mirando e artistanan grandi di taya internacional cu lo ta presente.

Un di e artistanan principal lo ta e famoso canta-autor Colombiano Carlos Vives. Vives actualmente ta un artista hopi solicita rond mundo debi na su sin fin di exitonan, produccion di concierto y carisma. No ta por nada cu recientemente e artista gana y a wordo nomina pa varios premio internacional. Pa Aruba y sigur e bishitantenan cu lo biaha pa mira Carlos Vives esaki lo bira algo inolvidabel.
Otro artistanan cu ya a confirma nan participacion na e anochinan aki ta e cantante Puertoriqueño “Bebe de la Salsa”, Jerry Rivera cu a revoluciona e mundo di salsa den añanan 90. Su inconfundible forma di interpreta salsa y su presencia carismatica a pone cu miles di fans ta cay pe y ta alborota cualquier lugar na unda e ta. Un otro artista cu no ta desconoci ta e cantante di merengue-bachata, tambe di Puerto Rico y conoci pa su cancionnan “Suavemente y Pintame” y awor e ultimo tema cu ta hopi comenta pa su palabranan controversial “Tatuaje”, ta papia aki di Elvis Crespo. Na 2013 el a tene un concierto na Honduras caminda a asisti mas di 30 mil persona pa mira e tremendo artista aki. Y pa e genero mas hoben tambe lo ta presente na e Aruba Summer Music Festival e cantante di reggaeton mas interesante y cu mayor prestigio den e panorama musical latino cu ta existi den actualidad. Ta papia aki di Nicky Jam. Na Maart ultimo despues di tabata mas cu un luna entre e prome posicionnan el a yega na e number 1 di ranking di Hot Latin Songs di e revista Billboard. Dia 23 di maart el a lanza e video oficial di e cancion “El Perdon” hunto cu Enrique Iglesias. Nicky Jam a converti den e fenomeno latino di You Tube ya cu e tin mas di 2.000.000 di friends y mas di 1 biyon bishitante. Hunto cu algun di e artistanan grandi aki tambe tin nos artistanan y bandanan local cu ta entre otro Zion, Dj Gogo, Dj Beatz y nos orguyo local Nutbeatz. Y bandanan cu ta e grandinan di Aruba, N’Fuzion, Tsunami, Le Groove, D’Licious y Robert Jeandor y su Solo Banda Show. Zonido lo ta den man High Performance y transporte pa e bishitantenan ta den man di e prestigioso Fofoti Tours. E dos anochinan aki tambe lo bay tin lugarnan special pa para auto y lo tin servicio di shuttle pa hiba y trece tur persona pa e lugar di e festival. Entradanan pronto lo ta na benta y lo tin package pa tur anochi y tambe pa anochinan individual. Tanto Loco Loco Productions, SD Concerts cu ta promotornan cu sa di tene conciertonan di caliber halto por bisa cu hunto cu Aruba Tourism Authority cu lo ta promoviendo e Aruba Summer Music Festival aki internacionalmente, por pronostica cu e prome festival aki lo bay surpasa tur expectativa.