Diamars 7 di aprel e ekipo di Centro Dominguito a presentá nan uniform nobo di sponsor pa Inselair. E presentason aki a tuma lugá riba patio di Maduro & Sons dilanti e ofisina di Insel Air na Dokweg. Durante e presentashon aki presidente di Centro Dominguito; Ramiro Griffith a yama danki na Inselair pa nan konfiansa i  aporte duná na Centro Dominguito . Den luna di februari Inselair i Centro Dominguito a yega na un akuerdo despues di un presentashon ku nan a mira di Centro Dominguito pa loke ta trata plan pa kuminsa un jeugdopleiding i tambe drecha vèlt di dòk na dominguito. Ramiro a pone énfasis riba e importansia di desaroyo di nos hubentut, den e kaso aki prinsipalmente mucha nan di Dominguito, koraalspecht, steenmij, bottelier i bisendario ku ke praktiká futbòl, ku pronto nan por hasi esaki riba nan tereno na dominguito.

Siguidamente señor Edward Heereveen di Inselair a hiba palabra i a indiká kon importante ta pa inselair di duna un aporte na desaroyo di nos muchanan. Inselair manera kustumber semper ta habrí pa duna un man, paso nan no ke mira pobresa den deporte na Korsou. Un jeugdopleiding sigur ta importante si nos ke mira nos futbolista nan profilá mañan riba nivel internashonal. Al final señor Heereveen a bisa ku un smail riba su kara ku Centro Dominguito Tinku sali kampion e kampionato aki.

Al final vice presidente di Centro Dominguito; Roderick Volk, i sekretario; Alex Molina a hiba palabra i hasi e parti di presentashon di e unifòrm nobo. E unifòrm a wordu presentá door di un dama empleado di Inselair i tambe dos hungadó di e ekipo; Luidjino Hoyer i Diguan Meyers. Centro Dominguito lo bai kompetí tambe den liga lito, kual ta un kompetensia pa muchanan di entre 4 pa 7 aña. Riba potrèt por mira tambe  dos hobensitu hungadó di U-6 i U-8 di Centro Dominguito.

Gradisimentu i gesto na un fanátiko

Centro Dominguito a mustra nan apresio na un fanatiko del alma. Chapulepè ta un fanátiko ku tur hende konosé den stadion ora di wega di centro dominguito.  Durante henter e wega Chapulepè ta animá e hungador nan ku algun frase klásiko: Laga e bala lora abou pa Chapulepè, no laga kai,  pone riba pinalti pa Chapulepè. Pa djies menshoná algun.
Komo e di 12 hungadó Centro a entregá Chapulepè tambe un unifòrm ku number 12 ariba, pa e por bisti durante di wega nan.