Espektakular alineashon pa e di seis edishon di Curacao North Sea Jazz

Awe ku gran orguyo nos por anunsiá e nòmbernan pa e di seis edishon di Curacao North Sea Jazz Festival riba 4 i 5 di sèptèmber. Despues ku nos ya a anunsiá anteriormente Oscar D’Leon i Juanes pa un konsierto grátis riba djaweps 3 di sèptember nos por anunsiá awor binida di Enrique Iglesias, The Isley Brothers, Gregory Porter, Cassandra Wilson, Charles Bradley, Bettye LaVette, Randy Newman, Stanley Clarke Band, Wyclef Jean i The Pointer Sisters. Tambe ta bini bèk nos isla dos di e éksitonan di mas grandi i favorito di públiko di e promé edishon, John Legend i Lionel Richie. Tambe nos por anunsiá binida di The 5 Blind Boys of Alabama riba dia 2 di sèptèmber na Brakkeput Mei Mei.

Nasí na Ohio John Legend ta un kantante kompositor hopi bes koroná komo bendedó di multi-platina. Su trabou a dun’é entre otro nuebe Grammy Award, un Academy Award, un Golden Globe Award, e BET Award pa Best New Artist i e Starlight Award spesial di Songwriters Hall of Fame. Riba su tan aklamá di kuater i mas resien álbum di studio Love in the Future tin tambe e sengel All of Me, Legend su mihó bendí i su hit mas grandi te awor. E piesa akí a alkansá posishon number 1 riba e Billboard Hot 100, den tantu Top 40 general komo e Rhythmic chart. Resientemente Legend a gana su promé Academy Award, su promé Golden Globe Award i e 2015 Critic’s Choice Award pa su piesa Glory, ku el a skirbi huntu ku Common i a ehekut’ é pa e pelíkula SELMA.

Kantante i kompositor Lionel Richi kasi no mester di introdukshon: el a bende pa mundu henter mas ku 100 mion álbum i el a risibí premio pa músika prestigioso manera: Grammy Awards, American Music Awards, un Golden Globe i un Academy Award. E aña akí e ta biaha rònt mundu ku su gira All The Hits All Night Long i nos ta kontentu despues di e éksito di 2010 di por yam’ é bon biní na e festival.

Strea mundial Enrique Iglesias a haña éksito na final di añanan nobenta. El a skor prinsipalmente den e dékada despues ku hit tras di hit, manera Bailamos, Rhythm Divine, Could I Have This Kiss Forever (ku Whitney Houston), Hero, Escape, I Like It en Can You Hear Me. Entre tantu e tin 10 album riba su nòmber; aña pasá a aparesé e último, Sex And Love. Iglesias ya a bende mas ku 137 mion di álbum, loke a hasié e artista latino mihó bendí na mundu.

Komo un di masha poko grupo The Isley Brothers a subi den sinku dékada lista di hit, pa di promé bes na 1959 ku nan mònsterhit Shout. Repertorio di The Isley Brothers ta realmente un trip down memory lane, ku hit manera Twist & Shout, This Old Heart Of Mine, Love The One You’re With, Who’s That Lady i Harvest For The World. Na 2014 Grammy Awards a premia banda di The Beatles tambe The Isley Brothers ku un premio Lifetime Achievement.

Den no ménos ku kuater aña Gregory Porter a krese bira un di e vokalistanan di jazz di mas grandi na mundu. I esun ku a mira aktuashon di e gigante amabel akí, ta komprondé direktamente pakiko. Porter ta yena su númeronan di soul ku jazz i blues, su manera desarmá di kanta i su baritòn presioso ta sòru pa rèspèt i emoshon. Na Kòrsou el a yega di duna un presentashon na Brakkeput Mei Mei promé ku e festival ‘real’ kuminsá.

Su mama tabata gusta Motown, su tata jazz, i asina e mayornan di Cassandra Wilson a sòru pa e deskubrí tempran su amor pa muzik. Aunke e ta prinsipalmente konosí komo artista di jazz, e kantante a hinka tambe ‘blues, country i folk’ den su obranan.Su último álbum Coming Forth By Day a aparesé anteriormente e aña akí. Wilson tin dos Grammy Awards riba su nòmber.

E kuenta di kantante Charles Bradley ta lesa manera un buki. E tabata semper sin un dak riba su kabes, el a traha pa años komo kòki i el a kuminsá komo imitadó di James Brown promé ku el a keda deskubrí na edat después komo artista original i el a haña un kontrato serka Daptone Records. E ta kanta balada di soul sentimental, pero tambe soulfunk di ‘uptempo’ brutu i e ta duna presentashon memoralbel ku su banda The Extraordinaries. Aunke ku entre tantu e tin 66 aña penshun ta parse di ta leu ainda pa e artista di sanger i kurason.

Aunke ku kantante di soul Bettye Lavette ya na edat di diesseis aña a saka su promé disko, el a konosé únikamente periodo limitá di éksito te dia su álbum I’ve Got My Own Hell To Raise a sali na 2005. LaVette tin un bos yená ku gòspel i blues i a wanta su kalidat den e sinkuenta añanan ku e ta kantando tokante su problemanan. Su último álbum Worthy a sali anteriormente e aña akí.

Kantante –outor, pianista, kompositor i areglista Randy Newman ta konta ku un tremendo lista di servisio. El a skirbi masha hopi hit pa otronan i e mes a subi lista di hit ku entre otro Short People (1977) i The Blues (ku Paul Simon, 1983). For di añanan ochenta prinsipalmente el a dediká di traha muzik pa sine. El a keda nominá 22 bes pa un Academy Award, di kua el a gana dos. Banda di esei el a risibí tres Emmy i seis Grammy i el a keda añadí na 2002 na Songwriter’s Hall Of Fame i na 2013 na Rock ’N Roll Hall Of Fame.

El a toka ku e nòmbernan di mas grandi den jazz i entre tantu nan ta yam’é ‘ un leyenda di jazz bibu’ . Stanley Clarke pa dékada largu ta un di e mihó i mas renovador basistanan na mundu i e promé den historia ku ta kohe bas tantu akústiko komo eléktriko ku mes tantu amor i alma. El ta flert den su karera largu ku estilonan manera pòp, R&B i hasta klásiko. Tòg jazz a keda ketu bai su promé amor pa e ganadó di kuater Grammy.

Wyclef Jean ta un rapero i músiko ku a nase na Haiti pero ku a krese na Merka. Despues ku el a bira konosí komo un di tres parti di grupo Fugees ku hitnan manera Fu-Gee-La, Killing Me Softly i Ready Or Not, Jean a kuminsá un karera hopi eksitoso komo solista. Komo artista el a subi e listanan di hit ku hitnan manera Gone Till November, 911 (ku Mary J. Blige), i Hips Don’t Lie (ku Shakira).

Grupo R&B The Pointer Sisters tin un karera ku ta surpasá sinku dékada. Nan a kuminsá un grupo di puru ruman muhé. Prinsipalmente den añanan ’70 i ’80 nan a skor hopi hit; entre 1973 i 1985 nan tabata no ménos ku diestres bes den Tòp 20 merikano i nan a pone tres Grammy riba nan nòmber. Hitnan grandi tabata entre otro Jump (For My Love), Fire, Slow Hand i I’m So Excited. Awendia e grupo ta konsistí di e rumannan Anita i Ruth Pointer i Sadako, un nieta di Ruth.

Curacao North Sea Jazz 2015

Djaweps 3 di sèptèmber: Oscar D’Leon, Juanes

Djabièrnè 4 di sèptèmber: John Legend, Cassandra Wilson, Gregory Porter, Charles Bradley, The Isley Brothers

Djasabra 5 di sèptèmber: Enrique Iglesias, Lionel Richie, Bettye LaVette, Randy Newman, Stanley Clarke Band, Wyclef Jean, The Pointer Sisters

Un di dos headliner i un nòmber èkstra aserka pa podio Sir Duke pa djabièrnè 4 di sèptèmber lo keda anunsiá pronto.