WILLEMSTAD, Kòrsou:  Kòrsou ta pendiente pa “Concierto Viva la Música Latina Curaçao 2015” dianan 30 i 29 di mei próksimo. Pa duna realse na e konsierto aki a agregá un apertura spesial dediká na salsa ‘kurasoleño’ presentá pa un di e músikonan altamente respetá i honrá den nos komunidat i internashonalmente Sr. Gregory Colina i su Orkesta. 

Gregory Colina: Un gran maestro:

Gregory Colina ta un yu di Kòrsou nasé na 1969 ku a bini for di un kuna di músikonan konosí. Asina por hasi menshon di entre otro Errol Toro Colina i Jacobo Colina ku ta konosí tantu den region Karibense i Europa. Na un edat di 18 aña sr. Colina a bai Hulanda pa sigui su estudio pa bira ingeniero di informashon tékniko.  Ademas di esaki sr. Colina a studia na Konservatorio di Rotterdam huntu ku maestro pianista Jan Hartong. Pa profeshonalisá su mes mas den músika sr. Colina akudí na vários kurso di areglo na Konservatorio Hilversum. Algun artista i banda internashonal ku sr. Colina a kompañá durante shownan bibu, giranan rònt mundu òf grabashon ta Bobby Cruz di Puerto Rico, Miles Peña di Cuba, Orlando El Niño Watussi di Venezuela, Hermanos Fatorusso di Uruguay, Luis Salinas di Argentina, Trina Medina di Venezuela, Canelita di Venezuela, Slide Hampton di Merka, Billy Brooks di Merka, Candy Dulfer di Hulanda, Lee Towers di Hulanda, Karin Bloemen di Hulanda, Yma America di Venezuela, Geraldo Rosales di Venezuela, Leonardo Amuedo di Uruguay, Enrique Firpi di Uruguay, Leslie Lopez di Puerto Rico, Bobby Stern di Alemania, Fra Fra Sound di Surinam i hopi mas. Por hasi menshon tambe di kuantioso festival musikal ku a konta ku aporte di sr. Colina manera e.o Mekka Jazz Festival na Hulanda, Temecula Valley International Jazz Festical na California, Havana Cuban Jazz Fesival na Cuba, “Jazz In” festival di jazz na Amsterdam, Heineken Jazz Festival na Rotterdam, Barquisimeto Jazz Festival na Venezuela, Heineken Jazz Festival na Kòrsou i hopi mas. “Concierto Viva la Música Latina Curaçao 2015” lo inisiá den tur su splendor ku un apertura di kita sombré na unda ku lo bai brinda tur bishitante un gira bèk den historia di salsa ‘kurasoleño’. Ta bon pa menshoná ku tur kansion ku lo wòrdu interpretá pa e orkesta aki lo keda kantá pa artistanan lokal i hinká den un bachi nobo. Di e forma aki SHOWBIZZ ta duna rekonosementu na nos músikonan lokal òf músikonan estranhero pero, bibá na Kòrsou. Despues di e apertura ofisial riba djabièrnè lo sigui ku e aliniashon estelar di artista ku lo presentá manera Gilberto Santa Rosa, Grupo Guaco de Venezuela i Jorge Celedón. Djasabra 30 di Mei lo tin presentashon di Olga Tañón, El Gran Combo de Puerto Rico, José Alberto El Canario i Alberto Barros.  Tur artista lo duna nan presentashon riba e mesun esenario, pues realmente ta trata di un gran konsierto- kada artista lo duna un show di 90 minüt. Ta rekordá un i tur ku lo bai presensiá e konsiertonan ku portanan di SAMBIL Curaçao ta habri for di 6:00pm pa 7:30pm en punto kuminsá “Viva la Música Latina Curaçao 2015”. Entrada pa e konsierto ta Naf 200 pa un anochi i Naf 350 pa ámbos anochi i karchi ta optenibel na Norsa NV (krédito), Albert Heijn Zeelandia,Van Den Tweel na Jan Thiel, Pizza Hut (tur 4), Pòmpstashon VANDDIS (tur 7 filial),  C-Post (tur 5 filial), Scarlet, Funmiles i Mensing’s Caminada. Tambe por kumpra karchi ‘online’ via di www.ticketscaribbean.com. Pa mas informashon tokante di Viva La Musica Latina por bishitá e página di Facebook òf por yama +5999 737.2025 ext. 135. Keda pendiente pa algun kampaña interesante riba e página di Facebook di Viva La Musica Latina.