WILLEMSTAD— Despues di un tremendo ‘kick-off’ djaweps nochi na Villa Maria kaminda Su Ekselensia Gobernador Lucille George-Wout a kompartí palabranan di inspirashon pa organisashonan sosial ku lo forma parti di CURA DOET i partnersnan, CURA DOET 2015 a start ofisialmente! E promé dia di CURA DOET riba djabièrne 20 di mart a ranka sali ku hopi entusiasmo. Nos promé Minister Ivar Asjes a inisiá simbolikamente konstrukshon di un greenhouse spesial pa hendenan den ròlstul na Handicap Rights Foundation. Boluntarionan a entretené malkriá grandinan na Sentro di Bario Montaña, Kas HugenHoltz i Stichting Karchi 60+, i na Rode Kruis nos grandinan a traha diferente obra di arte bou di guia di Andre Nagtegaal. Transformashonan total a tuma lugá na diferente instansia sosial den diferente bario. Fundashon Sonrisa a pinta diferente pintura na nan lokalidat pa nan klientenan por disfrutá di dje, Fundashon Futuro Briante na Soto a haña sosten di hobenan di Joseph Civilis na Barber pa férf i Kolegio Wim Ellis a keda ku un kurá limpi ku sosten di personal di grefi di parlamento. Na diferente organisashonan trabounan a kuminsá awe i lo sigi mañan. Riba djasabra 21 di mart lo tin 130 aktividat i lo kontinuá ku hopi trabou. Un danki grandi na tur e boluntarionan ku a forma parti i tur e kompanianan ku a yuda ku material i labor.