WILLEMSTAD- Djamars último Softball Team MCB Maskulino a hasi entrega di nan unifòrm nobo na nan miembronan. Softball Team MCB Maskulino su meta prinsipal ta pa hasi deporte i reforsá e laso di amistat entre koleganan ku ta hasi deporte i e koleganan fanátiko. E aña aki Softball Team MCB Maskulino ta deseá tambe na kontribuí na Banko di Sanger na Kòrsou dor di bisti semper promé ku wega i despues di wega di softball un shirt ku tin un mensahe “Give Blood, Give Life”. Ku e mensahe aki riba nan shirt nan ta trata na enkurashá, motivá i konsientisá tur hungadó i fanátiko di softball komersial pa nan tambe salba bida dor di duna sanger. Si for di aworakí abo tambe ta interesá pa bira un dunadó di sanger i bo mester di mas informashon, bo por tuma kontakto ku Banko di Sanger na 461-8433. Riba e mesun anochi di entrega di uniform, Softball Team MCB Maskulino a hasi entrega di un chèk na Curaçaose Atletiek Bond na balor di NAf. 5.000,–. Softball Team MCB Maskulino komo un organisashon deportivo ku ta kere den deporte ta konsiente di e super bon trabou ku Curaçaose Atletiek Bond ta hasiendo ku nos hobennan den Atletismo i a disidí na usa un parti di loke e Jump-In “Bo number ta bai hunga” a rekoudá pa yuda Curaçaose Atletiek Bond. Softball Team MCB Maskulino ta gradisí Caribbean Welding Scaffolding & Insulation Services NV (CWSIS) ku a instalá e plataforma di e Jump-In kompletamente grátis i asina a yuda kreá espasio pa entre otro hasi un donashon na Curaçaose Atletiek Bond, yuda gruponan di Teenerparade St. Jozef VSBO i UDC/CDC i tambe Grupo di Karnaval Vise Vèrsa.