Produktor lokal ta regresá ku e konsepto di programa di televishon interaktivo i ta ofrese oportunidat pa ta parti di produkshon huntu ku e tim di Boarding Pass.

Promenade – Djabièrnè 20 di mart 2015 un tim di produkshon lokal ta sali pa graba e promé destinashon den Sur Amerika pa e programa di biahe “Boarding Pass.” Na 2013 ya kaba públiko televidente i tambe via internèt por a disfruta di e promé temporada di Boarding Pass. Nos por a mira e tim bishita diferente paisnan den Sur Amerika, islanan den Karibe i tambe siudatnan grandi manera New York, Rio de Janeiro i Medellín. Den e lokalidat di Avianca, ku huntu ku Insel Air, Curacao Airport Partners (CAP), CIBC FirstCaribbean Bank, GoWeekly, Telecuracao i CBA ta fasilitá parti di e produkshon di Boarding Pass, Kòrsou por a sera konosí ku e tim di produkshon i algun di e partnernan. Tambe e Produktor ehekutivo David Mitchell a splika tokante kampañanan pendiente, kaminda ku pueblo di Kòrsou por partisipá pa gana entre otro e oportunidat pa biaha ku e tim di Boarding Pass i eksperensiá e destino na un manera diferente à la Boarding Pass. Asina a inisiá ofisialmente e temporada di produkshon di e programa di televishon nobo pa 2015.

Konsepto di Boarding Pass

Biaha, konosé i eksplorá diferente parti di mundu ta loke hopi hende na Kòrsou gusta i tin gana di hasi. Segun e produktor di Boarding Pass hende gusta konose sitionan nobo, eksperensiá influensianan diferente, partisipá na aktividatnan aventurero, purba kosnan straño i topa hende interesante. Den e temporada nobo aki e tim di Boarding Pass un bes mas lo laga públiko televidente disfruta di su aventuranan i impreshonnan nobo ku e lo bai eksperensiá durante diferente biahe.

Boarding Pass pa un i tur

Loke ta ainda mas interesante ta ku pueblo di Kòrsou tin oportunidat pa bai huntu ku e tim komo un “BOARDING PASS BUDDY!” Pues tin un èkstra Boarding Pass pa un hende mas bai di biahe. Keda pendiente pa tur e kampañanan relashoná ku Boarding Pass! ‘LIKE’ Boarding Pass riba www.facebook.com/boardingpassshow, sigui e informashonnan pa sa ki dia Boarding Pass i kada partner ta start ku diferente kampaña pa siguidónan por partisipá i gana diferente premio. Sigui Boarding Pass via TeleCuracao, e programa di mainta na CBA New Day, radio, korant, facebook.com, i GoWeekly. Partisipá na e kampañanan di e partnernan di Boarding Pass i wak si Ta BO NÒMBER ta riba e siguiente Boarding Pass!

E tim di Boarding Pass

Tim di produkshon ta konsistí di produktor ehekutivo i direktor David Mitchell, presentadó Aisha Tromp, eskritor i ko-direktor Elizabeth Francisco, kamarógrafo Eduardo Galban i fotógrafo Ramsay Soemanta. Mas informashon di Boarding Pass i e kampañanan?