WILLEMSTAD- HOPE Softball Tournament 2015 ta bai ranka sali. Nos di ACZHON, e asosashon di personal di Stichting Overheidsaccountantsbureau (SOAB) for di aña
2014 a tuma over e organisashon di e prestigioso torneo di sòfbòl komersial i sosial di slowpitch “HOPE” ku ta pará pa “Helping Others Persevere & Excel” ku e aña aki
ta kumpliendo su di 10 aniversario. HOPE ta e konsepto ku a wòrdu inisiá dor di Stichting Belasting Accountants Bureau (SBAB) i a kontinuá bou di direkshon di KOMPA, e asosashon di personal di Maduro & Curiels Bank N.V. Mas o menos 50 instansia i kompaníanan di Kòrsou tur aña di nobo ta inskribí pa partisipá na e torneo aki. E aña aki no tabata un eksepshon. Banda ku partisipando na HOPE trahadonan ta wòrdu stimulá pa ta aktivo deportivamente pafó di e esfera di trabou, e instansia i kompanía nan aki ta yuda rekoudá fondo tambe di e forma aki pa hinka bèk den komunidat. E aña aki tin 49 instansia di Kòrsou di kual 68 tim ta partisipando na HOPE. Kompetiendo den e gategoríanan sosial femenino i sosial maskulino, maskulino challenger i maskulino/femenino kombiná. Weganan ta kuminsá djabièrnè 20 Mart próksimo i lo terminá dia 26 Aprel 2015. Weganan ta tuma lugá riba djabièrnè, djasabra i djadumingu na SUVEK Ballpark. Apertura ofisial lo ta riba djasabra 21 Mart di 18:00u – 19:00u tambe na SUVEK Ballpark. Pero sin yudansa di otronan lo no ta posibel realisá un torneo di e magnitut aki i tambe realisá e meta ku e torneo aki tin ku ta rekoudá fondo pa hinka bèk den komunidat. Pues ku orguyo nos por informá bo(so) ku nos tin e aña aki un biaha mas HEINEKEN komo partner den e torneo ku kual nos kier sigui hiba HOPE na un nivel mas haltu. 10 aniversario Entretantu nos a hasi eskoho tambe di un instansia na kual nos fondonan rekoudá lo bai. Un instansia pa kual nos lo bai formalisá un proyekto konkreto. Esaki despues di un analisis hasí entre diferente instansia. Nos lo bai kontrobuí ku un “green house” pa Stichting New Creation Curaçao na Otrobanda. Un fundashon ku ta guía mucha hòmber entre 14 pa 20 aña ku pa un o otro motibu a bini den problema ku hustisia pa por drenta bèk den nos komunidat. Nos lo garantisá manera semper tabata e kaso un dushi ambiente i un bar i kushina bon surtí durante e weganan di e torneo aki. E aña aki nos ta bai tin un huki spesial pa mucha. Pues mayornan ku ta bini o pa partisipá den e torneo o pa bin wak wega lo no tin di preukupá kiko tin di hasi pa e yunan, ya ku lo tin un solushon pa esaki. Pa mas informashon por tuma kontakto ku Shareday Christina òf Sandra Fokké na telefon 466-9000.