WILLEMSTAD— E di dos edishon di CURA DOET, e akshon boluntario di mas grandi na Kòrsou, ta tuma lugá djabièrne i djasabra próksimo dia 20 i 21 di mart. Diferente organisashon sosial, inkluyendo organisashonan di bario, di skout, di deporte, di grandinan i hopi skol rònt Kòrsou a inskribí en total 180 tarea òf aktividat riba www.curadoet.com i ta buskando hopi boluntario pa djòin nan durante CURA DOET dia 20 i 21 di mart 2015. Pa yena tur tarea i aktividat mester di mas ku 3000 boluntario. Ya tin mas ku 40 kompania inskribí ku lo bai dun’un man komo boluntario. Diferente instansha i departamentu di gobièrnu, skol i ‘service clubs’ tambe lo forma parti. Famianan i gruponan di deporte tambe ta kontribui. Pero ainda tin algun tarea i aktividat ta buskando algun boluntario adishonal. No keda afó i inskribí promé ku 18 di mart pa bo tambe bin dun’un man. Boluntarionan por mira tur e tareanan i aktividatnan riba www.curadoet.com  i por inskribí komo individual òf grupo pa bai yuda. E dos dianan ta un okashon úniko kaminda diferente hende di tur edat por bin huntu — koleganan, amigunan, kompañeronan di deporte i famianan— pa nifiká algu pa otro i pa komunidat. CURA DOET ta ser organisá dor di Curaçao Cares i ‘Het Oranjefonds’ i ta forma huntu ku BON DOET, ARUBA DOET, NLdoet i pa promé biaha e aña aki SXM DOET i STATIA DOET, e akshon boluntario di mas grandi di reino i Karibe. Pa inskribí komo boluntario por bishitá www.curadoet.com. Pa mas informashon tambe lo por email curadoet@curacaocares.org