Willemstad – Dia Internashonal di hende Muhé un grupo di dama hóben di Maduro & Cuiel’s Bank, Young Professionals, a partisipá na un konferensia i debate riba e tópiko di desaroyo di hende muhé komo profeshonal.  Un evento ku a wòrdu organisá pa 0031Productions, Internationale  Vrouwendag Curaçao (IVC) ku e tópiko “Not that kind of woman”.  Kolega Rustanne Mercelina di MCB a formá parti di e pènel.

E konferensia/debate aki a tuma lugá na Casa Bernardo den Punda den un sala kompletamente yen pa hóben profeshonal den diferente funshon na Kòrsou. Casa Bernardo ta un lokalidat úniko ku un bista bunita riba Punda i Scharloo ku pa hopi tempu no tabata den servisio i a habri spesial pa e okashon aki.

E anochi a habri ku e oradó prinsipal señora Jeanne Henriquez ku a elaborá riba union di nos hende muhénan. No ta tur hende muhé tin òf tabatin e oportunidat pa desaroyá  su mes komo profeshonal. Tambe e la splika ku hasta na Hollywood ainda tin diferensia entre hende muhé i hende hòmber. Den un seri di televishon popular e muhé protagonista femenino ta gana 7%  i e hende hòmber 9% di e ganashi. Anfitrión di e anochi tabata Noraya Godfried i Dj Lucy a etretené e públiko presente ku su músika desplegando tremendo talento komo DJ, no opstante ku e ta hende muhé. Ruvette Dirksz, un hóben dama emprendedora, determiná  i ku amor pa su trabou a keda homenagiá  ku é “That Woman Award”.

Maduro & Curiel’s Bank ta hopi orguyoso di tur e dama koleganan di nos Banko. MCB lo sigui ofresé nos damanan oportunidat igual di kresementu i desaroyo. Pabien na tur hende muhé.