Willemstad, Curaçao – Fin di siman próksimo, di 13 pa 15 di mart, ACU lo ta aktivo ku hóbennan riba área di deporte. Tres deporte bastante praktiká pa hóbennan na Kòrsou, Boneiru i St. Maarten ta risibí un sosten finansiero, komo muestra ku ACU ta kere den desaroyo i progreso di e hóben den amplio sentido di palabra. Komo un instituto sosial ku ta kontribuí na desaroyo sosial, kultural i finansiero di su komunidat, ACU a introdusí na aña 2010 un Fondo pa Hubentut ku e meta prinsipal pa sostené programanan sosial i edukativo dirigí na hóbennan. Responsabilidat pa e hóben ku ta forma parti di nos komunidat ta preskribí den nos statutonan i ta forma parti di prinsipio di un koperativa. P’esei tur sosio ku ta forma parti di ACU ta kontribuí finansieramente na e Fondo pa Hubentut aki. Atraves di e Fondo pa Hubentut, ACU ta sostené programanan riba área di edukashon, formashon, kultura, arte i deporte. Ta trata di programanan eksistente, ku mayoria bes no ta funshoná optimal debí na poko rekurso. Edukashon i formashon di nos muchanan na kas, na skol i den e komunidat por lo general ta karesé di e atenshon nesesario,  ku e konsekuensha ku nos muchanan lo no ta sufisientemente prepará pa enfrentá e retonan di futuro. Lokual na su turno tin influensha riba e komunidat di pais Kòrsou, di kual nos tur ta forma parti. Ounke ACU no por yuda tur mucha individual den nan desaroyo sosial edukativo, e ta duna un aporte pa kontribuí ku programanan kaminda muchanan den grupo ta haña oportunidat pa krese. P’esei e wikènt próksimo ACU ta bai sostené tres aktividat di deporte, esta futbòl, natashon i atletismo. Riba tur e diferente áreanan di deporte aki lo tin un torneo òf kompetensha. Tur e federashonnan enbolbí, esta Curaçaose Atletiekbond i Federashon Aquatiko Kòrsou i klupnan òf timnan partisipante ta risibí un donashon di parti di ACU i tambe lo hasi un donashon èkstra na e gruponan ganadó. Di e forma aki ACU ta stimulá tantu e organisashonnan deportivo, komo e hóbennan ku ta praktiká un deporte pa kontinuá ku esaki. ACU ta invitá pueblo di Kòrsou en general i en partikular su sosionan pa hasi uso di e oportunidat aki pa bin apoyá nos muchanan. Ta un orguyo di por forma parti di un organisashon ku tin sosten na komunidat komo parti di su maneho. E aktividatnan deportivo ta tuma lugá konforme e siguiente skèdjel:

FUTBÒL

C.V.V. Willemstad (pegá ku stadion di SUBT)

Djabièrnè, 13 di mart, 17.30 – 22.00

Djasabra, 14 di mart, 14.30 – 18.00

Djadumingu, 15 di mart, 9.00 – 12.30

ATLETISMO

Stadion Ergilio Hato, SDK

Djasabra, 14 di mart, 8.00 – 12.00

Djadumingu, 15 di mart, 8.00 – 12.30

NATASHON

Stadion Ergilio Hato, SDK

Djasabra, 14 di mart, 11.00 – 13.00 / 18.00 –21.00