E ta firma ku Stage Entertainment na Alemania

Willemstad – Na final di luna òktober 2013 e hóben kantante Qushannick Thode, mihó konosí komo Qshansz èks kantante di Cache Deluxe ta bai biba na Oberhausen (Alemania). Qushannick ta yu di e dos orguyoso mayornan Amerigó Thodé ku ta miembro di Parlamento i Enid Kierindongo. E motibu di e mudansa aki ta pa e bai forma parti di un produkshon teatral (musical) nobo ku lo wòrdu produsí pa Stage Entertainment. Stage Entertainment ya pa vários aña kaba ta e kompania di teatro di mas grandi na Oropa ku ta kaminda e hóben Danny Yanga ta firmá pa e produkshon “The Lion King” ku tambe ta aktualmente na Hamburg (Alemania). Algun aña pasá Qushannick a bai Ulanda pa studia “Economics & Business” na Universidat di Erasmus na Rotterdam i a kuminsá militá den e front di e famoso banda Cache Deluxe. Hopi lihé Qushannick mes a ripará ku musika no tabata djis un hobby pe i a skohe pa banda di su estudio di ekonomia i tambe su karera musikal hasi deeltijd muziektheater na Musical Factory na Tilburg. Akinan ela wòrdu prepará riba e tres disiplinanan; esta kanto, baile i aktuashon. Tambe e la disidí di amplia su konosementu di theoria musikal. Despues di a finalisá tantu su estudio di ekonomia aña pasá òktober i awor tambe esun di theater e aña aki ku éksito, a sigui un periodo intensivo di audishon den kwa e mester a biaha diferente biaha pa Hamburg (Alemania) pa asina e kompania Stage Entertainment por a skohe su persona den e kantidat di auditantenan pa forma parti di e elenko di nan produkshon nobo. Tokante di e produkshon i tambe e ròl ku Qushannick tin den e totalidat aki no por wòrdu divulgá masha ahinda pa motibu ku e kompania den e kaso aki mes lo kier hasi esaki den nan Press Release na luna di òktober 2013. E notisia aki ta nifiká sinembargo ku e próksimo tour di Cache Royal na kuminsamentu di òktober di e aña aki na Kòrsou lo ta e delaster tour ku Qshansz lo forma parti di dje por lo pronto. Qushannick ta yama danki na promé lugá na Dios pa su talento, na su mayornan ku a sa di sostené den su eskohonan maske kon difisil esaki tabata, su rumannan i amigunan ku den bon i den malu a sa di motivé pe logra su metanan i naturalmente na tur su fanatikonan ku semper a karg’é i lo sigi karga kuné den su karera musikal nobo. Un pabien i hopi éksito den su karera ta bai pa Qushannick i esaki ta bira otro logro pa un yu di tera ku a logra un otro hanzana mas pa nos komunidat.