Djasabra último hopi ta esnan ku a presensia e promé reunion di e grupo di karnaval Helengue. Mester bisa ku Chobolobo Room na WTC a kai chikí debí na e mas di 125 personanan karnavalista o futuro karnavalistanan ku a bini pa tende i mira e promé presentashon di e grupo di karnaval Helengue. Helengue ta e grupo nobo di nos artista Danny Yanga pa ku karnaval, i si nos por a komprondé ta pa promé biaha ku un grupo ta debutando pa karnaval ku ta atrahé asina tantu hende pa un promé reunion. Riba e anochi aki Danny Yanga den un forma agradabel e i su team ku ta konsisti di 13 persona ku hopi eksperensia den karnaval a presentá, papia i elaborá riba e grupo i tur e plannan ku nan ta bai logra ku esaki. E anochi tabata ameno i teniendo kuenta ku e periodo di kuaresma tòg bo por a sinti e vibe pa ku e espektativa pa ku Helengue su debut i partisipashon pa ku gran marcha 2016. E vishon i mishon di Helengue ta pa uni pueblo i engrandesé nos marcha di karnaval di un manera ku hopi ambiente, festivo i luhoso i pa nos ban krese tantu komo hende i grupo i krea un famia grandi pa asina marcha e ruta di karnaval. Danny a pone hopi énfasis riba loke ta trata ambiente, “Helengue, Ta nos tin e Ambiente”. Despues a toka turno na e parti ku a mustra e diseñonan di e trahenan ku Helengue ta bai debutá karnaval kuné i e tema ku ta “A tribute to Jembers fashion carnaval”. Sala di WTC a bira hopi entusiasmá ora ku Danny a show e diseñonan di e trahenan Hot, Hotjes, Fire i Fire Fire i Spicy ku ta nòmber di e trahenan espektakular i bunita ku e grupo ta bai marcha den dje. e grupo ta bai karnaval pa gosa, dibertí i ambiente na promé lugá i bo por a mira i sinti e vibrashon na momentu ku tabata hasi e presentashon na e públiko. E grupo ta bai ta hopi prometedor i hopi ta e espektativa kaba pa ora e grupo ta bai gran marcha. Mester agregá ku Helengue ta bai ku tres diferente estilo di trahe i pagando un suma pa kada trahe. Loke ta haña grátis den bo pakete ta Gym pa tur partisipante durante e último lunanan te ku fin di desèmber 2015, i durante e ruta karnaval 2016 ta bon entretenimento musikal, konsumo i bar di stòk, ambiente i tur esakinan den e kontribushon. Helengue ta bai ku banda, Dj i alabes diferente artistanan lokal ku ta bai entretené e Helengeronan i tambe mester pone aserka ku Helengue ta pendiente pa bai karnaval ku un artista Internashonal. Si bo ke inskribí òf tuma mas informashon bo por like e Facebook page di Helengue ku por sierto a bula mas di 500 likes den ménos ku 1 siman. Por yama e numbernan 5213700 òf 5606225 òf por whatsApp 0059995213700 pa mas informashon. Keda pendiente pa e próksimo reunion den Aprel 2015.