Dia 5 di mart 2015, na nan hogar na Rooi Santu # 69, famia Margaretha ta risibí representantenan di Gobièrnu di Kòrsou sra. Minister Irene Dick i su tim, representante di sr. Minister Balborda, sr. Kenneth Pieter, Komishon Nòmbernan di Kaya huntu ku sr. Richard Hooi, un luchadó inalkansabel pa e kousa pa duna rekonosementu na e akto heróiko di sr. defuntu Modesto “Chano” Margaretha. Historia ta konta ku riba dia 8 di febrüari 1958 sr, Chano Margaretha a lanta i dirihí palabra na Papiamentu pa promé biaha den Konseho Insular. Ku e akto akí nos lenga Materno Papiamentu a hasi su entrada den Konseho Insular i a keda presente te dia di awe. Pueblo di Kòrsou por sigui tur reunion den Parlamento i komprondé esakinan, pero kisas no a yega di hasi e pregunta kon bin esaki ta posibel. Esaki ta debí na e kurashi i derterminashon di nos baluarte mayó Chano Margaretha pa trese e kambio esensial akí ku ta di gran balor pa tur yu di tera. Nos idioma Materno Papiamentu a i ta kedá balorá i aktivamente uzá durante di reunionan ku ta keda hibá den e organo mas haltu di Pais Kòrsou ku ta nos Parlamentu. Durante e akto ameno na kas di famia Margaretha sr. Richard Hooi a elaborá riba e historia i e impakto ku e hazaña di Chano Margaretha tin pa tur nos islanan ruman ku ta uza e idioma Papiamentu den organonan gubernamental. Tambe sr. Hooi a duna balor na Minister Irene Dick ku komo un gran Papiamentista, a komprondé e nifikashon profundo di e hazaña di sr. Modesto “Chano” Margaretha i a tuma e desishon pa proklamá dia 8 di febrüari komo dia Nasonal di nos Lenga Materno Papiamentu i e periodo entre 8 i 21 di febrüari (dia internashonal di idioma Materno) komo periodo pa pone atenshon na i alsa nos Lenga Materno Papiamentu. Sr. Kenneth Pieter a elaborá riba e importansia ku e akto akí di duna rekonosementu na un hende humilde di e bario mes tin, pa e habitantenan di Band’ariba i e importansha pa e komo un mucha di Rooi Santu. Sra. Minister Dick tambe a hiba palabra i elaborá riba e echo ku no tin mihó kaminda pa honra nos baluarte Mayó di nos idoma Materno ku ta sirbí komo vehíkulo di komunikashon pa nos pueblo. Ta bon pa menshoná ku den e bario di Rooi Santu e nòmbernan di kaya ta representá instrumentonan di telekomunikashon. Minister Dick a opservá i duna elogio na famia Margarethaku pa e ambiente speshal na nan kas loke ta refelehá e forma riba kual e famia frekuentemente ta bin huntu den aktividatnan familiar i asina den forma positivo konserva e banchi familiar, refelehá e spiritu di pas i duna inspirashon na otronan pa ta famianan uní, positive I produktivo. Finalmente riba e pregunta di sra. Minister Irene Dick i sr. Pieter ku si famia ta aseptá e desishon di Gobièrnu di Kòrsou pa hasi e kambio di nòmberdi kaya, famianan a aseptá I gradisí pa e honor grandi aki. Sra. Nelly Cijntje-Margaretha a hiba palabra na nòmber di su mama, Sara Margaretha di 101 aña, su rumannan i tur sobrá miembro di famia. Gobièrnu di Kòrsouta felisitá famia Margaretha i ta pasa pa organisamentu di e akto ofisial.